Oslo Ess skal rocka inn sommaren på Festidalen
Hovudstadsbandet Oslo Ess har sju studioalbum, elleve radiosinglar, tusentals konsertar og eitt Festidalen-besøk bak seg. No kjem dei tilbake med rocken sin
Publisert
Sist oppdatert
Det er også umogeleg å ikkje kjenna att lyden av det bookingsjefen Daidalos Dahle omtalar som rennesteinssjarmørane.
– Dei har sparka opp dørar, knust vindauge og seld ut klubbar og storsalar over heile landet sidan gjennombrotet i 2010. Og no kjem dei for å samla hordane framfor scena på Dønhaug. Sug i deg gitarar med vreng og feite refreng i Noreg sitt flottaste rocketerreng, oppmodar Dahle.
Annonse
Han gler seg storleg over at bookinga frå 2013 spaserer inn igjen på festivalplakaten i år.
– For oss pasifistar er dette rett val av ammunisjon. Eksplosivt og inntrengande. Klar tale og taktfast gange. I den verda me bur i no er det fleire som burde lada om frå bly til breibeint rock, melder Daidalos Dahle om gjengen frå hovudstaden.
Han gler seg også over at Festidalen har seld for mykje meir i år, samanlikna med same tid i fjor.
– Billettsalet har gått bananas! Og snart slepp me fleire artistar, mellom anna ein kul kis frå söta bror som byrjar på T. Pokker så godt det skal bli med sommar, smiler mannen bak bookingane.
