Ordnar stiane i Baroniparken

Den gradvise restaureringa av Baroniparken har tidlegare blitt omtala som det langsame skodespelet av professor i hagekunsthistorie Annegreth Dietze. Den førebels siste akta i skodespelet har vore restaurering av stiane i parken, men det er på inga måte finaleakta.

– Me starta med dammane, og var fleire rundar og jobba med det, men såg også fort at det var meir som måtte gjerast. Det har rasa somme stader, og det er dårleg oppbygging av stiane og terrassane. Dermed har me prioritert stiane no i vår, fortel professoren til Grenda.

Vått klima

Arbeidet følgjer ein del av planen som hagekunsthistorikaren følgjer for Baronihagen.

– Eg var her med driftsleiaren for gamlehagen i Bergen og diskuterte med han kva som skulle gjerast korleis det skulle løysast, blant anna fordi han veit korleis der her på Vestlandet, med mykje regn og vatn. Det som de har her er langt meir enn me er vane med på Austlandet, understrekar Dietze.

I mars er det spesielt fem av stiane mellom slottet og rosehagen og dammane som har blitt tatt. Annegreth Dietze har hatt med seg sine faste ekspertar i Bjørn Anders Fredriksen og Jan Høvo i arbeidet med stiane, i tillegg til innleigd arbeidskraft frå Anleggsgartner Svein Boasson AS til noko av jobben.

– Me ser no korleis dei blir, korleis dei set seg og om det me gjer med dei held, og så kjem me tilbake og justerer om det trengs. Får me ein dårleg sommar med mykje regn, så me då kanskje gjerast noko raskare enn opphavleg tenkt. Me går også systematisk gjennom dei andre stiane, forklarer professoren.

Utsikt frå Utsikten

Sjølv om det ikkje syns for publikum, er det mykje arbeid som er gjort under grusstiane som losar publikum rundt i parken. Blant anna er ny drenering lagt ned, samt nye oppsamlingskummar komne på plass, utan at det syns for turgåarar.

– Me håper publikum veit å verdsetja det som no er gjort. I tillegg har fått litt utsikt frå Utsikten. Det var heilt tett der, men er no tynna i. Me plukka ut somme tre, noko som har lysna det veldig, men ikkje gjort det ustabilt. Me ser allereie no kva me må gjera der til neste vinter, seier Dietze, som har neste akt i skodespelet under planlegging.