Ordknappen til Totland

På dagen eitt år etter at Anders Totland fekk Nynorsk barnelitteraturpris frå Noregs mållag, vart han heidra med Ordknappen frå Leser søker bok (LSB).

Fredag førre veke var han ein av fire som fekk prisen, som er eit heidersmerke for dei som har gjennomført sitt første prosjekt saman med Leser søker bok. LSB gjev konsulenthjelp til utvalde forfattarar for å gjera bøkene enklare å lesa. Då Totland byrja samarbeidet med LSB førte det til omfattande omarbeiding av boka «Så lenge ingen ser oss».

– Vi gjorde drastiske endringar, og enda vel med det 15.utkastet. Det var veldig mykje arbeid, men det førte til eit betre resultat, og eg trur også betre respons, på boka. Eg er heilt klar for meir samarbeid med dei, seier Totland.

I går var forfattaren frå Valen i P2 sitt studio for å spela inn ein times opptak til programmet Sommer i P2. Programmet blir sendt på radio i august, og er eit konsept der han i prinsippet snakkar om det han vil og får velja musikken. Kriteriet for å bli invitert er at ein må ha markert seg innanfor feltet ein driv med.

– Det var veldig stas å bli invitert, seier Totland.

– Kva snakka du om?

– Livet, døden og dei store spørsmåla. Og om å springa fort på fjellet, fortel han.