Opna utstilling med kunstnartrio
Laurdag bada ølvesbygda i sol, medan tre gode, erfarne kunstnarar opna utstilling.
Publisert
Mellom 30 og 40 personar tok turen då påskeutstillinga opna i Galleri Banken, men fleire kom til utover dagen. Marta Nerhus, som sjølv er frå Ølve og er ein anerkjent kunstnar, har fått frie tøymer til å setja saman kunstnarar til fleire utstillingar her denne våren. Dette er den fyrste av desse, og her har ho teke med seg to kjære kunstnarkollegaer.
Etter at ølvesbuen Håkon Ulvenes Yndestad hadde starta det heile med vakker song, vart kunstnarane presenterte.
Annonse
– Dette er to gode kollegaer, Anne Britt Lerøy og Synneva Heradstveit frå Bergen, som har verkstad på Verftet, der eg òg held til, sa Marta og nikka til kunstnarane.
– Også har me fått med oss Kamilla Sajetz Mathisen, som har tilknyting til Ølve. Det var veldig kjekt å få med oss ho, men ho kunne dessverre ikkje vera her i dag, la kuratoren til.
Nysgjerrige
Alle tre er profesjonelle kunstnarar og har lang kunstutdanning. Dei har jobba jamt og trutt, og har hatt mange store utstillingar.
Annonse
– Dei er nysgjerrige og har heile tida vore i god utvikling, roste Marta Nerhus.
Ho karakteriserte Kamilla Sajetz Mathisen sine skulpturar som poetiske, underfundige og vakre.
– Ho har ei sterk interesse for menneske, som biologiske og mytologiske vesen. I sommar skal ho jobba med installasjonar inne i skogen ved Hamsundsenteret i Nordland, forklarte Nerhus.
Anne Britt Lerøy jobbar med forskjellige grafiske teknikkar, og Marta Nerhus er fasinert over krafta, styrken og følsomheita i streken hennar. Kunsten til Lerøy er mellom anna kjøpt inn av kulturdepartementet, Kulturrådet, Norge Bank.
Essensen i landskapet
Om Synneva Heradstveit hadde ho følgjande å seia:
Annonse
– Synneva grip med desse bileta essensen i landskapet. Dei gjer meg ei kjensle av noko som er djupt inni meg.
Bileta er poetiske og minimalistiske. Fargen er det viktigaste i desse akvarellarbeida.
– Eg har kjent Synneva sine bilete veldig lenge. Ho målte båten «Mathilde» (som er bygd på Nerhusøyra i Ølve). Ein kan finna Synneva sine bilete i offentlege bygg, og ho skal seinare i sommar ha utstilling på Agatunet, informerte Marta Nerhus.
Salsutstillinga står til 21. mai.
