Opna fantastisk utstilling

Det aula med små og store, spesielt fyrstnemnde, i inngangspartiet til Varehuset Rosendal då årets utstilling skulle opnast. Før alle fekk gå opp og sjå på kunstverka, var det høgtidleg markering i trappa til 2. etasje. Marianne Lamberg sa nokre velvalde ord på vegner av Jul i Rosendal.

– Det er spennande å sjå utstillinga kvart år. I år er resultatet heilt fantastisk, slo ho fast.

Lamberg fortalde også at årets tema er «Engel», men det var ikkje ein gut i forsamlinga heilt samd i.

– Det er ikkje temaet. Julenisse er temaet, hevda han hardnakka.

– Nei, det var eit anna år, smilte Marianne Lamberg.

Så var det musikalsk underhaldning med skulekameratane frå barnehagane i Rosendal og Omvikdalen. Dei framførde tre songar, før snora kunne klippast. Til det ærefulle oppdraget fekk Lamberg hjelp av skulekameraten Emma.

Inkognito

Sjølve utstillinga er sett saman av bidrag frå elevar i dei to nemnde barnehagane, samt Omvikdalen skule, Malmanger skule og Rosendal ungdomsskule.

– Dette er kjempegreier. Det er så kjekt å gå inkognito i utstillingsområdet og sjå dei små ta med seg familien for å visa kva dei har laga, for dei er så stolte, sa leiar i Jul i Rosendal, Kristin Lamberg, til Grenda.

Ho kunne elles fortelja at Jul i Rosendal gjennom fleire år har betalt 50 kroner per barn til skulane og barnehagane til innkjøp av formingsmateriell.

– Vi veit dei har tronge budsjett, så då er det veldig kjekt å bidra på denne måten. Berre i år vart det 416 slike løyvingar, opplyste Kristin Lamberg.