Opna dørene i Bergslagen

Jorun Larsen er ny styreleiar for Sunde kyst og litteratursenter, og brukte den opne dagen til å bli kjent med folk gjennom jobben som loddseljar.

– Eg blei spurd om å vervet tilbake 2016, og har førespurnaden med meg heile vegen etterpå. Frøet har liksom sett litt rot på desse åtte åra. Då eg vart spurd igjen no, så hadde eg lyst til å engasjera meg, under føresetnad at eg har den tida eg har, forklarer den nye styreleiaren i stiftinga Sunde kyst- og litteratursenter, som er det formelle namnet på Bergslagen.

Breitt nedslagsfelt

Hovudappellen for Larsen er det breie spennet som Bergslagen rommar.

– Det er eit mangesidig prosjekt, med lokalhistorie, litteratur og kystkultur. Det passar inn i mine interesser, og det er eit breitt nedslagsfelt og det passar med det eg brenn for.

Mi primæroppgåve blir å fylla huset med aktivitet, og det trur eg kan få til, seier Larsen.

– Etter eg slutta i Grenda, så har eg hatt eit stort sakn etter å vera i kontakt med folk, og her sit eg og sel lodd, og alle kjem og spør kven eg er, og ynskjer me velkommen til Bergslagen, legg Larsen til.

Kjell Magne Stråbø, som enda som styreleiar i 2016, held framleis tråden i alt som er knytt til det bygningsmessige i Bergslagen.

Variert tilbod

Den opne dagen baud på mange måtar på det same spennet som Larsen påpeikte. Gerd Røstbø hadde eventyrstund for dei minste, medan Georg Røssland la til rette for engasjerande båtbygging for dei som var gamle nok til å svinga hammaren.

– Dei har lagt sjela i båtemna her, påpeikte Røssland, som også raskt gjorde klar at prefabrikeringa var gjort av andre enn han.

Vegard Bjelland Røssland (9) var ein av dei som kunne forlata Bergslagen som båtbyggjar på laurdag.

– Det var gøy! Eg har gjort det litt før, og det kjekt, sa han medan fokuset 100 prosent var på spiker og hammar.

Inne i kjellarlokalet i Bergslagen overtok Egil Vaage og Halldor Tveit både scene og publikumsfokus, og spelte blant anna Kari-Pers polka, kjent frå Påskelabyrinten, på hardingfele og trekkspel.

Det var også levande fisk å kikka på, film av Merethe Offerdal Tveit å sjå og høyra på, og gamle båtmotorar å sjå, høyra og lukta på. I sum alt ein kan be om av ein open dag, spesielt når det vart krona av eit par staselege båtar på kaikanten.

Lensmannsbåten til Ole A. Haukenes pryda nemleg sjøsida til Bergslagen saman med den litt meir moderne seglbåten «Elding». Ole hadde med barnebarnet Jørn S. Haukenes (16) som mannskap på turen frå Varaldsøy laurdag morgon.

– Me starta heimefrå halv ni, og var framme før halv tolv. Det var ein fin tur, trass regnet, seier Haukenes, som feira 78-årsdagen sin på Sunde og i båten.