Omfattande oppussing i kyrkja

Nye omnar, nytt toalettanlegg og oppussing av sakristiet. Dette er noko av arbeidet som skal gjerast i Kvinnherad kyrkje framover.

Kvinnherad kyrkje har fått mykje utvendig vedlikehald dei siste åra. No er turen komen til det innvendige. Kyrkjegardsarbeidar og vaktmeister Helge Furdal er allereie godt i gang med å gje sakristiet eit betydeleg løft. Mellom anna får veggane eit nytt strøk med spesialmåling.

– Dette er linoljemåling, så det er ikkje rett fram å gå ned på måleforretninga og kjøpa, smiler Furdal.

Målinga er godkjent av Riksantikvaren, og skal vera mest mogleg lik den som var i sakristiet frå tidlegare. Furdal skal òg leggja nytt golv i rommet, montera kjøkenkrok og setja inn kontorpult med datamaskin. I tillegg skal det koma nytt langbord i sakristiet. Det gamle skal flyttast til bakre del av kyrkjeskipet, der kyrkjekaffien vert servert. Det er elles verdt å nemna at den gedigne safen er fjerna. Den er no donert til Kvinnherad skyttarlag.

– Safen vog over eitt tonn, så den var veldig tung. For å få han ut, måtte Terje Hus koma med traktoren sin. I døropninga hadde vi ein halv centimeter å gå på, humrar Helge.

Behageleg temperatur

Noko kyrkjegjengarane kjem til å merka endå meir, er at det er montert nye omnar under benkane. Dei kokvarme røyromnane som stod rett over beina, er tekne bort. No er det sett inn tre omar under seta på kvar benkerad. Alle har gitter føre.

– Då er det mykje tryggare for ungane, og så er det ingen skosålar som vil smelta. I gudstenesta på søndag var oppfatninga at det var rikeleg varmt, og då hadde vi omane berre litt på. Vi skal forska litt på dette og finna ein behageleg temperatur, opplyser Furdal.

Dei nye omnane vil dessutan gje ei stor innsparing på straumrekninga. I tillegg til at omnane er meir effektive, kan ein styra dei via ein app på telefonen. Også Eid kyrkje på Halsnøy har no fått slike omnar.

– Vi skal truleg ta fleire kyrkjer etter kvart, men Eid og Kvinnherad vart prioriterte sidan dei har høgast straumforbruk, informerer vaktmeisteren, og legg til at Riksantikvaren har løyvd pengar til prosjektet.

Into Elektro hadde oppdraget i Eid kyrkje, medan Kvinnherad Elektro gjer arbeidet i Kvinnherad kyrkje. På måndag denne veka hadde sistnemnde bedrift to lærlingar og to ungdomar utplasserte frå Kvinnherad vidaregåande skule på jobb i kyrkja.

Eit sorgas kapittel

– Vi lurer òg på om vi skal skifta til LED-pærer i ljosekronene. Det er nærare tjue 100 watt-pærer i kvar, så også her er det mykje å spara. Mogleg vil vi gjera det same i alle kyrkjene på sikt. Det vert nesten tusenvis av pærer i alt, smiler Helge Furdal.

Når han er ferdig med sakristiet, skal Furdal i gang med å vøla toalettanlegget ved Kvinnherad kyrkje.

– Det er eit sorgas kapittel i dag, for det er både trongt og dårleg. Dessutan manglar det handikaptoalett. No skal vi laga til to toalett, og det eine vert tilrettelagt for handikappa. Eg gler meg til å byrja på denne jobben, for det er alltid kjekt å ta noko som har dårleg standard og erstatta det med noko av høg kvalitet, seier ein engasjert Furdal.