Ølve mållag legg ned – Kvinnherad mållag overtek

For ti år sidan, i 2014, vart Husnes mållag og dåverande Kvinnherad mållag slegne saman. Reint formelt vart det då oppretta eit nytt mållag med same namn som sistnemnde. Etter den tid har Kvinnherad mållag eksistert side om side med Ølve mållag, som dei to siste attverande i sitt slag her i kommunen.

Men no blir språkrørsla i Kvinnherad samla under ein paraply. For nokre månader sidan bestemte nemleg Ølve mållag seg for å leggja ned. Laget har no 79 medlemmer, av desse er 23 busette i Ølve, Hatlestrand eller Varaldsøy.

– Desse vert overført til Kvinnherad mållag med verknad frå 2025. 56 medlemer har adresse andre plassar i landet og vert overført til det næraste lokale mållaget. Slik er systemet i Noregs mållag, opplyser Kristian Bringedal, leiar i Kvinnherad mållag, til Grenda.

Overrekte bilete

Hendinga vart markert på laurdag. Då tok mållaget med seg forfattarane Anne Karin Fonneland og Arne Torget til Ølve og arrangerte bokdag i ungdomshuset. Samstundes overrekte Malena Aasen frå Ølve mållag eit portrett av Ivar Aasen til Kristian Bringedal.

– Biletet har hengt i huset til Jardar Skaadel, mannen som var arkitekten bak Ølve mållag. No vart det gitt til oss. Det har også vore diskutert kva som skulle skje med arkivet til Ølve mållag, men vi vart samde om at det skal oppbevarast i skyttarlagshuset i Ølve, der dei har eit lokalhistorisk arkiv, fortel Bringedal.

Medlem i Russland

Ølve mållag vart skipa 18. januar 1980. Allereie etter tre veker hadde dei 66 medlemmer. Under Skaadel si leiing, fekk laget også nasjonal merksemd. Både politikaren Lars Sponheim, gruvedirektøren på Svalbard Robert Hermansen og Telenor-direktør Tormod Hermansen meldte seg inn. Og i 1993 skreiv Grenda at språkgeniet Vladimir Puzatov frå byen Astrakhan i Russland hadde blitt medlem i Ølve mållag. Også ein professor i London og ein i Finland var medlemmer. På det meste stod 250 personar på medlemslista til Ølve mållag.

Etter 44 år er det slutt. Den siste leiaren, Tone Birkeland, fortel til Noregs mållag si avis Norsk Tidend, at vedtaket vart gjort med tungt hjarta.

– Etter pandemien har det vore vanskeleg å få til noko særleg aktivitet, diverre. Vi prøvde å sjå om det var nokon som kunne tenkja seg å ta over før vi gjorde nedlegginga formelt. Ingen har meldt seg. Det har vore vanskeleg å verva nye medlemmer, og ikkje mindre vanskeleg å rekruttera nye folk til styret,. Slik er realiteten, seier ho.

Tenkja større

Kvinnherad mållag, som no passerer 200 medlemmer, lovar å ta godt vare på det nye området sitt.

– Vi er lei oss for at dei måtte leggja ned, men vi ser positivt på å ta ansvar også for Ølve, Hatlestrand og Varaldsøy. På neste årsmøte ynskjer vi å velja ein representant derifrå inn i styret vårt. Vi legg gjerne nokre møte dit også. I tillegg vil Målblomen heretter også kunna gå til verksemder i desse bygdene, og kåringa av beste nynorskbrukar i ungdomsskulen må også omfatta Hatlestrand skule. Vi skal rett og slett ta desse bygdene med i vårt arbeid og tenkja større, slår Kristian Bringedal fast.