Olga Marie feira 100 år: – Ho har levd eit alminneleg, stille og godt liv

Hundreåringen er fødd og oppvaksen på Eikeland, med mor frå Ølve og far frå Hatlestrand. Ho er den midterste i ein søskenflokk på sju, og den einaste som er att frå sin generasjon, forutan to svigerinner.

Dottera hennar Eldbjørg Sørheim (74), som har budd i Rogaland sidan ho var 16, set stor pris på å framleis ha mor si i livet.

Sjølv om ho er heilt klår i hovudet, har Olga mista store delar av språket. Av den grunn er det Eldbjørg som fortel Grenda noko om kva jubilanten sine 100 år har innehaldt.

– Olga reiste ut som taus for fyrste gong når ho var 15 år. Mellom anna var ho i Sørfjorden, og ho var også ute og tente på Hallingskeid. Ho hadde postar på fleire gardar, fortel Eldbjørg over telefon.

Bygde på heimegarden

Olga gifta seg med Knut Stølen i 1946-47. Dei var jamgamle og hadde kjend kvarandre heile livet.

– Dei kjøpte eit stykke av garden mamma var frå, og bygde hus på Eikeland i 1953. Der budde dei til far min vart dårleg i 2006. Då flytta dei til Ølve alderspensjonat, kor dei budde saman til han døydde i 2008. Mor mi har sagt at ho ikkje kunne tenka seg ein betre stad å bu enn der, fortel Eldbjørg takksamt.

Ho meiner at foreldra levde eit alminneleg, stille og godt liv.

Herremåltid av ei halv fiskekake

Etter krigen gjekk Olga på husmorskule der ho lærte mykje.

– Mamma likte godt å laga mat og å eksperimentera på kjøkenet. Eg vaks til dømes opp med pasta og den slags. Far min sa at ho kunne få eit herremåltid utav ei halv fiskekake, så ho var kjent for å få mykje utav lite.

Elles var Olga heimeverande, kor ho mellom anna hjelpte til med forskjellig arbeid på garden. På slutten av 1950-talet kjøpte ho seg ei strikkemaskin som var flittig i bruk. I tillegg brukte ho å sy, og var, i følgje dottera, flink med hendene.

Både Olga og Knut hadde seks søsken kvar, og familien er såleis stor. Under bursdagsfesten i Gamleskulen på Hatlestrand talde Eldbjørg 40 gjester. Forutan eitt oldebarn, var heile familien samla.

Storfamilien samla

– Mor mi var veldig tydeleg på at ho ville feira dagen, men ei stund var det litt usikkert om me ville få det til, grunna koronaen. Olga fekk jo også korona. Men me fekk det til og det vart kjempebra, seier Eldbjørg.

Jubilanten fekk mykje blomar og kakebordet bogna.

– Olga har alltid likt å laga i stand selskap, og at det har vore mykje kaker. Som gamal husmor har det vore viktig for henne at det var rikeleg på bordet, slår Eldbjørg blidt fast.

Huset på Eikeland blir no nytta av Eldbjørg og familien hennar som feriebustad, og dei er på Hatlestrand minst ei veke kvar månad. Likeins som Eldbjørg, er også resten av familien glade for at dei enno har Olga Marie i livet sitt.

– Mamma har eit oldebarn på 25 år, som tykkjer det er veldig stas å framleis ha oldemora si her, sluttar ho.