Offentleggjer fyrste artist: Sigrid

Festidalen 2025 vert arrangert 27. og 28. juni. Ein av artistane, og truleg også ein av headlinerane, vert Sigrid. 28-åringen frå Ålesund sitt fulle namn er Sigrid Solbakk Raabe. Ho slo igjennom i 2013, då songen «Sun» vart kåra til Ukas urørt på NRK P3.

«Sigrid er ein hemningslaus gledespreiar. Ei ustoppeleg popkraft. Det dirrar av forventningar føre ei kvar scene ho entrar. Og endeleg er ho klar for Festidalenscena. Ungdommeleg og moden. Ujålete og fordømt sjarmerande. Dette er deileg potent sommarpop. Fylt til randen med pasjon», skriv Festidalen i ei pressemelding.

Arrangøren slår fast at ho er ei av våre aller største internasjonale stjerneskot. Hylla frå Japan til USA.

«Og sjølv om ho herjar radiostasjonar verda over, har ho gong på gong bevist at låtane lever eit enda sterkare liv live. Ho blømer som våren sjølv i møte med publikum. Ja, sjå gjerne mot julestjerna no. Men hugs også at rett borti der, over taket på Dønhaug, lurar straks sommarsola», står det i meldinga.

The Missing Link

Bookingansvarleg Daidalos Dahle kommenterer:

– Sigrid er det motsette av autotune og plastisk kirurgi. Live er Sigrid så mykje meir enn berre ein artist. Ho pumpar låtane fulle av rå kraft og nærvære. Positivt popmagi. The Times hylla Sigrid og skildra ho som «The Missing Link» mellom rytmisk pop og den reflekterande indie-rocken. Eg stiller meg 100% bak denne påstanden. Og legg til at ho ikkje berre er den manglande linken der, ho er også den eksisterande linken mellom ungdommeleg vestlandskraft og den store verda. 1,5 milliardar streams seier kanskje noko om hennar braksuksess.