Nytt album frå Elsa & Emilie

Fredag 20. januar slapp popduoen Elsa & Emilie sitt andre studioalbum, «Kill Your Darlings». Og i byrjinga av februar legg dei ut på norgesturne.

– Det kjennes utruleg bra å endeleg vera ute med albumet. Vi har brukt lang tid og arbeidd hardt for å få ting i hamn, så det er veldig godt å no vera i mål, seier utflytta sundebu Elsa Søllesvik.

Arbeidet med «Kill Your Darlings» starta Elsa Søllesvik og Emilie Haaland Austrheim opp med allereie månaden etter dei slapp debutalbumet «Endless Optimism» tilbake i 2014. Men alt gjekk ikkje knirkefritt i starten.

– Vi fekk det ikkje heilt til. Songane var ikkje bra nok, produksjonen løyste seg ikkje og inspirasjonen mangla. Så vi valte då å byta produsent samstundes som vi flytta til Oslo, og vi starta på mange måtar med blanke ark. Så albumet vi no har gitt ut er i alle hovudsak spelt inn frå starten av 2016 og fram til juni same år, men det har også innslag av ting som stammer frå fyrste forsøk, seier Elsa.

Albumnamnet, «Kill Your Darlings», stammar også frå arbeidet med albumet, og handlar om at ein av og til må setja til sides sine eigne lyster for å gagna heilheita i lengda.

– Då meiner eg at sjølv om eg har ein favorittsong, så er det ikkje sikkert at den passer til dette albumet. Så sjølv om eg har veldig lyst å ha han med, er det lurt å droppa den sidan den vil øydeleggja heilskapsinntrykket på albumet, seier Elsa.

I tillegg til nytt album er duoen også aktuell med ein ny musikkvideo, i tillegg skal dei no i februar ut på norgesturne.

– Det skal bli veldig gøy å ha så mange konsertar med fullt band så tett oppå kvarandre. Så det gler vi oss veldig til, sluttar ho.

Dei opnar med to konsertar i Trondheim 2. februar, før vegen går vidare til Son, Bergen, Volda, Kristiansand, Haugesund, Stavanger og Oslo.