Nye og gamle tonar frå Perlene: - Dette var heilt fantastisk!
Barnekoret Perlene gav publikum ein veldig fin julekonsert onsdag kveld. Det var mange begeistra ord å høyra på veg ut frå Eid kyrkje etter konserten.
Det er ikkje småtteri å øva inn ein heil julekonsert medan ein eigentleg held på med førebuingar til «Hakkebakkeskogen», som Perlene skal framføra i februar. Men jammen fekk dei tid til å gje folk julestemning i år også. Det er det nok mange som set pris på.
Eid kyrkje var pynta med både tre, varme julelys og kjølige scenelys, det var eit nydeleg vinterbilete som møtte publikum då dei kom inn i kyrkjerommet. Og endå finare vart det sjølvsagt då Perlene sjølve entra rommet og gjekk opp midtgangen med lys i handa medan dei song Santa Lucia.
Annonse
Fin variasjon i uttrykket
På førehand fekk me høyra at det ville vera mange gamle, kjende julesongar på denne konserten. Me fekk høyra songar som «Et barn er født i Betlehem» og «Eg er så glad kvar julekveld». Men det var eigentleg like mange nyare julesongar, så det vart eit fint samspel mellom tradisjon og nyare låtar.
Konserten var også variert med mange ulike solistar, både store og små. Både koret og alle solistane song kjempefint, klart og reint, med eit flott uttrykk. Til og med dirigent Maria Hansen fekk vera solist, på songen «Snart jul».
Det var ei fullstappa kyrkje, med tilhøyrarar i alle aldrar som kunne nyta konserten, og me vil tru det var mange som vart rørt av den fine barnekor-klangen.
Annonse
– Dette var heilt fantastisk!, høyrte me ein eldre mann utbryta då me var på veg ut.
Dei som hadde det tekniske ansvaret må ha hatt ein stor jobb med å rigga opp både lyd og lys i kyrkja. Det håpar me dei vil gjera neste år også, for det var veldig fint og stemningsfullt at konserten var sett til kyrkja i staden for i Kulturhuset, der Perlene brukar å høyra til. Er det å håpa at dette blir ein ny tradisjon?
