Ny informasjon om krigsskipet: – Biletet viser truleg den nederlandske kryssaren «Java»

Krigsskipet som Grenda prenta bilete av på torsdag, var truleg ein nederlandsk kryssar som vitja Rosendal i 1926.

Fredag la Grenda ut eit gamalt bilete som truleg er teke av Gerhard Ness. Motivet viste eit krigsskip inst i Skålavikjo i Rosendal, men vi kjende korkje til nasjonalitet eller nøyaktig årstal, sjølv om vi rekna med at biletet var teke ein gong på 1930-talet.

Heldigvis gjekk det ikkje lenge før Trygve Nes kunne supplera med viktig informasjon. Han meiner besøket skjedde i 1926, og la ved eit fotografi som A. E. Røvde tok av same hendinga.

– Biletet viser truleg den nederlandske kryssaren «Java». Båten vart seinare senka av ein japansk torpedo i Javasjøen 27. februar 1942, skriv han.

Bakgrunnen for at skipet vart observert i Rosendal, skuldast eit flåtebesøk i Oslo sommaren 1926. «Java» var truleg innom Hardangerfjorden på same turen.

Trygve Nes noterer seg elles at i Gerhard Ness sitt bilete ser vi atelieret til Røvde heilt i framkant. Rett bakom der står ei litt større bygning.

– Det er mogleg møllebygninga på verftsområdet til Skaaluren som seinare vart kjøpt av Einar og Arne Skåle og flytta til Jørafjæro, spør han seg.