Norges største musikkpris tildelt Knut Vaage: – Ei stor anerkjenning
Komponisten Knut Vaage frå Sunde er tildelt både ein prestisjefylt pris og ein god slump pengar.
Publisert
Sist oppdatert
Lindemanprisen blir til vanleg delt ut kvart år til ein komponist, utøvar eller musikkpedagog som har gjort ein spesielt betydingsfull innsats i norsk musikkliv. Den vert rekna som landets største musikkpris og ein av dei mest prestisjefylte, og blir delt ut av styret for Lindemans Legat på grunnlag av innstillingar frå oppnemnde fagråd. Prisen er for tida på 200.000 kroner.
No er årets pris tildelt Knut Vaage. 62-åringen er frå Sunde, men bur i Bergen. Sidan tidleg 90-tal har han vore ein av landets fremste samtidskomponistar, og har skrive i ei lang rekke verk innan ulike kategoriar, deriblant tre operaer. For to år sidan var han nominert til Nordisk råd sin musikkpris.
Annonse
Tydeleg nærvær
I grunngjevinga frå Lindemans Legat står det:
«Hans musikalske prosjekt evner å treffa lyttaren på ein direkte og umiddelbar måte, samtidig som dei aldri går opptrakka stiar. Som del av denne metoden har Vaage vigd stor plass til arbeidet med improvisasjon. Utvikling av eit hybrid akustisk/elektronisk lydbilete er eit sentralt tema i Vaage sitt kompositoriske arbeid. Denne spenninga mellom akustiske instrument og elektronikk har prega utviklinga av hans eigenart og stil».
Styreleiar i Lindemans Legat, Einar Solbu, legg til følgjande på legatet si heimeside:
Annonse
– Knut Vaage er ein særprega kunstnarpersonlegdom i norsk musikkmiljø. Han er ein svært aktiv og allsidig kunstnar med ei eigenarta musikalsk stemme. Han har gjennom mange år hatt eit sterkt engasjement og eit tydeleg nærvær i norsk musikkliv. Han er ein verdig prisvinnar, seier Solbu.
Ei stor anerkjenning
Knut Vaage er sjølvsagt svært glad for prisen.
– Dette er ei stor anerkjenning av den musikken eg står for og svært gledeleg, seier han til legatet.
Lindemans Legat slår fast at vinnaren har hatt stor betyding for kunstmusikken og kunstmusikkmiljøet på Vestlandet, men han har også vore ein markant skikkelse i nasjonal og internasjonal samanheng.
– I den grad det finst ein raud tråd i det eg driv med, så er det å oppretthalda min kunstnarlege fridom og å få lov til å bruka heile paletten. Det gjer meg nok meir til ein maksimalist enn ein minimalist, seier han sjølv.
Annonse
Lindemanprisen blir delt ut under ein festkonsert på Norges musikkhøgskole den 18. oktober.
