Nanna Sofie med «typisk kjærleikshistorie»
Fredag 5.mai slepp Nanna Sofie Fredheim sin andre låt, kalla «Looking at Me». Dette er ei låt det ligg mange timar og mykje arbeid bak.
Publisert
– Eg har jobba lenge med denne låten, og hadde eigentleg andre planar for den. I haust reiste eg til Cuba på utveksling, og difor vart planane litt endra, fortel ho.
Nanna Sofie bur for tida i Bergen og er sjukepleiarstudent. Det er travle dagar når ho skal balansera studie og musikk.
Annonse
– No er eg midt i låtslepp og bachelorskriving, så tida strekk ikkje heilt til. Eg har kanskje litt lett for å vela vekk skulen, då det er musikken eg brenn mest for nett no, fortel ho.
Det blir difor ikkje tid til sleppfest, men dei som vil kan sjå Nanna Sofie framføra låta live for fyrste gong på Vidsyn Musikkfestival i juni.
– Låta slepp eg neste fredag, og det kjem òg ein liten teaservideo om ei vekas tid, så då får ein jo ein liten smakebit, seier ho.
«Looking at me»
Annonse
Låta vart skriven før Nanna Sofie reiste til Cuba, men resten måtte venta til ho kom heim. I februar starta arbeidet med å spela inn og produsera låta.
– Eg fekk kontakt med ein veldig dyktig produsent frå Sotra som heiter Eirik Grønner, som er Bjørn Moe sin produsent. Saman vart vi einige om at vi skulle prøva oss på låta, seier ho, og legg til;
– Eirik har nok måtta jobba litt ekstra dei siste månadene, eg har fått mykje hjelp og gode råd av han.
Nanna Sofie beskriv Eirik Grønner som ein mentor, og er veldig glad for at han tek seg tid til å støtta og rettleia. Saman har dei jobba iherdig med å få låta ferdig.
– Eirik hadde fokus på at dette skulle bli ei låt eg ikkje berre likar no, men likar om 10 år òg, seier Nanna Sofie.
Låta, som starta som ein ballade men enda opp som ei pop-låt, er ein typisk kjærleikshistorie. Den handlar om å bli i eit forhold når du veit du burde dra.
Annonse
– Eg gler meg veldig, og håpar at folk vil lytta til låta, og at dei liker den. Eg har brukt så mykje tid på den at eg bryr meg nesten meir om kva folk tykkjer om denne låta enn mi første, ler Nanna Sofie.
