Multikulturell jazz til Uskedalen

«Freedom Tree sitt konsept er moderne world-jazz med afro-brasilianske rytmar, med røter i både gammal og ny tid. På konserten får publikum høve til å høyra trioen servera eigenkomponert musikk med heftige innslag av world-jazz-rock blanda med tropiske rytmer», heiter det i ei pressemelding frå Husnes Jazzklubb.

Freedom Tree har base i Stockholm, og er samansett av gitarist Steinar Aadnekvam frå Bergen, perkusjonist Deodato Siquir frå Mosambik og elbassist Rubem Farias frå Brasil. Dei tre brukar òg stemmene sine på ein del av musikken.

«Steinar Aadnekvam er oppvaksen i Bergen, og har dei siste ti-tolv åra hausta internasjonal verksemd for musikken sin. Han er ein av få som spelar moderne jazz på akustisk nylongitar. Det store gjennombrotet fekk han i 2010 etter å ha vore finalist i Jazztrio under Molde Jazzfestival. Då debutplata «Simple Things» kom ut like etterpå, vart han invitert til festivaljobbar i heile Nord-Europa», heiter det i pressemeldinga.

Aadnekvam møtte bassisten Rubem Farias då han budde i Brasil for å jobba med brasilianske musikktradisjonar. Farias var fattig, og vaks opp i slummen i delstaten Bahia. Han viste tidleg musikalske evner og fekk byrja på musikkonservatorium i Sao Paulo som 13-åring.

Deodato Siquir er ein afrikansk multiinstrumentalist som har lang fartstid i musikken. Han har vore anerkjent side-man i mange world-music prosjekt verda rundt.

«Til saman har trioen opptredd på fleire hundre konsertar i 17 land, men i 2020 var det stopp. No er det heldigvis atter fritt fram for å kunna by publikum på ekte, levande kvalitetsmusikk!», skriv jazzklubben i pressemeldinga.

Konserten er i Dønhaugkjellaren.