Michelle Ullestad til Festidalen - og salet går godt

– Me har hatt ei røys av dei på Festidalen siste åra; Kjartan Lauritzen, Kamara, Gabrielle, Aurora, Lerche, og mange fleire. Men no kjem ei av dei mest spanande på lenge! Michelle Ullestad er ei råsterk popstemma, med noko så unikt som ærlege tekstar, melder Daidalos Dahle.

– Michelle Ullestad er ein artist med galopperande kjensler. Nokre gangar rir ho kjenslene, andre gangar let ho kjenslene halda taumar og pisk. Sånt blir det brunstig musikk av. Det er forsiktig, men intenst. Og sårt, men festleg. Men mest av alt er det fullt av hjarta og musikkglede, seier Daidalos vidare om musikaren som nyss vart nominert til i den gjeve Spelemanns-kategorien «Årets låtskrivar.»

– Det er det pokker ikkje vanskeleg å forstå, for det er frigjerande ærleg! Eg elskar når tekstforfattarar vågar å trakka så nært opp i seg sjølve. Smarte refleksjonar, og så open om alt at ein touchar det naive. Der ligg genialiteten. Det er ein meir utfordrande balansekunst enn kanskje folk er medvitne om, legg Dahle til.

Festidalen-plakaten byrjar å bli full, og det merkast at mange av artistane på den nemnde plakaten treff publikum godt. Det merkar festivalleiinga.

– Me har selt dobbelt så mange billettar som på same tid som i fjor, og som kjent vart fjordåret utseld. Det er vanvittig kjekt å sjå at kvinnheringane trykker Festidalen til brystet, og sikrar seg sommarens happening før det er for seint. Me er svært takksame, audmjuke, og ikkje så reint lite stolte! oppsummerer Dahle.