– Merkar at dette går heim
Scenen er på plass, baren er snart klar og festivalvêret kunne knapt vore betre. I dag startar Vidsyn Musikkfestival, med marginane på si side.
Publisert
Allereie 2. februar i fjor annonserte Ingve Hesjedal at langtidsvarselet viste fint vêr denne helga.
– Venner og kjente, i 2023 vert husbonden på Vidsyn 40 år. Det må sjølvsagt markerast. Laaangtidsvarslinga ser bra ut for helga 9.-11. juni (neste år altså!), med sol og berre god stemning. Sånn sett kan det vera lurt å halda av dei dagane i kalenderen. Kva me skal finne på, er endå litt uavklart. Men det blir garantert moro! skreiv han på si eiga facebookside på.
Annonse
Og jaggu har vêret slått til.
– Eg ser at dette går heim. Det merkar me på billettsalet, seier Ingve om festivalen mellom riggeslaga heime på Vidsyn på Nes i Rosendal.
For no er det rigging for fulle mugger. Festivalområdet inngjerda. Scenen har kome på plass og kome opp. Baren er klar. Det er likevel nok å ta tak i.
– Eg treng litt fleire toalett av deg, seier Ingve inn i telefonen, ein telefon som ikkje står stille torsdag kveld.
Annonse
– No er det eigentleg berre organisering det er tid til. Eg får knapt gjort noko fysisk arbeid, men alle dei frivillige som stiller opp har vonleg å henga fingrane i, håper festivalsjefen.
Fredagen er sett av til Døssi, Markella, Marion Woodseth og DePresno. Laurdagen startar med Theodor Lucero, før Nanna Sofie Fredheim overtar scenen. Deretter kjem Cherry Cinema og Hanna Storm, for Team Me får æra av å avslutta festivalen.
– Det er tidenes første, og kanskje siste, Vidsyn Musikkfestival. Det er no ein må hoppa på om ein skal få det med seg, lokkar Hesjedal.
