Må avlysa Haugespor-framsyninga

Med bakgrunn i smittesituasjonen lokalt, har arrangørane avgjort at dei utset framsyninga av Haugespor til våren.

– Me hadde verkeleg gledd oss til ein humoristisk historietime i kinosalen på Husnes torsdag i neste veke, men det er ikkje kjekt å reklamere for eit arrangement der me på ein måte håpar det ikkje kjem for mange. Me har og eit inntrykk av at folk vegrar seg litt for å gå ut der ein kan møte mange andre nå, forståeleg nok, melder Jan-Ove Fagerheim på vegner av dei fire av sokneråda i Kvinnherad hadde som har gått saman og invitert Ryfylke Livsgnist til kommunen.

Ryfylke Livsgnist skulle ta publikum med på eit jubileumsspel i Hans Nielsen Hauge sine fotspor 250 år etter hans fødsel. Det blir altså ikkje i denne omgang, men det har gjort nye avtalar både med Kulturhuset og Ryfylke Livsgnist.

– Så då er det berre til å notere seg fjerde torsdag i mars til neste år. Då skal me få læra, le og bli rivne med igjen, av dette historiske og humoristiske skråblikket på haugianismen. Me trur at jubileumsspelet kan hjelpa oss til å sjå kvifor me blei som me blei her i landet. Dei som hadde kjøpt billettar får ein mail frå Kulturhuset med info når det gjeld refusjon av pengar og liknande, melder Jan-Ove Fagerheim for kyrkja i Kvinnherad.