Lys og vårleg utstilling

På ein elles regntung dag var det godt å komma inn i det nyoppussa lokalet. Det er nymåla og har blitt installert betre lys. Dei lyse og lette bileta til Anne Knutsdatter Wille nesten sveva på veggen.

Grenda fekk ein liten prat med kunstnaren minuttane før offisiell opning. På spørsmål om ho kjenner til Ølve fortel ho sidan ho var lita har dei feriert på Tysnes, og har derfor køyrt gjennom bygda mange gongar.

– Eg har alltid synst det er så fint her i Ølve, smiler ho.

Samarbeid med skulen

Kunstnaren som bur i Ytre Arna har kjent kurator Marta Nerhus i mange år og fortel at ho fekk spørsmål om å ha utstilling for nokre månadar sidan.

– Eg fekk ein telefon frå Marta i haust om eg hadde lyst å stilla ut. Sjølvsag hadde eg lyst til det. Ein seier jo aldri nei til å stilla ut og visa bileta sine, men eg har ikkje hatt tid til å laga noko nytt, då eg held på med ei stor utstilling som opnar i mai i Bergen. Den må eg prioritera, fortel ho og forklarer at ho derfor har samla saman nokre bilete som spenner over mange år.

– Når eg ser bileta hengt opp her, synst eg dei passar saman og ber bod om vår og sommar. Det er godt å komma inn her, sa ho.

Til slutt røper ho at ho skal ha eit opplegg med Montesorriskulen i løpet av perioden utstillinga står.

– Eg gler meg til å vera med borna på skulen. Eg har undervist ved Bergen kulturskule i mange år og stortrivst saman med barn, smiler ho.

Denne opninga trekte mykje bergensarar og hyttefolk, men lite bygdefolk som kanskje hadde andre planar denne dagen. Gallerieigar Airin Zimmer og Marta Nerhus ynskte velkomen og fortalte litt om lokalet og oppussinga. Anne sjølv fortalte kort om bileta, og Eva Røyrane nytta høvet til å reklamera for fotoutstillinga i Posthuset over vegen og Kulturnemnda sin påsketur, langfredag frå Skarvatun til Låte.