Lokale bøker mest populært

Både Rosendal Bokhandel og Norli Husnes fortel at bøker av lokale forfattarar sel godt i Kvinnherad.

– Av lokale bøker, så må «Det kvite gullet» av Sigurd Vikøren trekkast fram. Den har utmerka seg i salet her hjå meg, og eg har fått bestillingar på den boka frå folk over heile landet, seier Bente Soldal i Rosendal Bokhandel.

Fonneland og Fatland

Boka tek for seg historia til Statkraft sitt kraftverk i Mauranger, og Soldal er den einaste bokhandlaren som fører boka. Ho nemner også «Globoid» av Arne Torget som ein av bestseljarane. Elisabeth Skogseth på Norli Husnes nemner også Torget si bok når ho vert beden om å oppsummera høgdepunkta frå fjoråret.

– Det er veldig kjekt at det vert gjeve ut så mange bøker av lokale forfattarar. Både «Sognerosa» av Anne Karin Fonneland, «Fartøyhistorie del 2» og «Frakken til Paul» av Aasmund Taarn Sande er blant bøkene som har selt godt her.

Når det gjeld bøker som ikkje kjem frå Kvinnherad, er det éi bok som skiljer seg ut hjå begge bokhandlarane:

– «Sjøfareren» av Erika Fatland har merka seg desidert best ut, konstaterer Bente Soldal.

– «Sjøfareren» har selt veldig godt her òg. Og så har me selt mykje krimbøker, det verkar som om folk likar å gje krimbøker til julepresang, fortel Elisabeth Skogseth

Nådd alle budsjettmåla

På Norli er dei godt nøgde med året som har gått. Spesielt desember var ein månad med god omsetnad, kan Skogseth fortelja.

– Me har nådd alle budsjettmåla for 2024, så me er veldig godt nøgde, seier ho.

Bente Soldal har inntrykk av at folk sitt handlemønster inn mot jul har endra seg litt dei siste åra, noko som ho seier nasjonal statistikk også syner:

– Folk kjøper litt færre julegåver enn før. Ein har gjerne slutta å kjøpe til tanter og søskenbarn, og konsentrerer julehandelen meir til kjernefamilien. Men året har no gått bra, heilt på det jamne i forhold til korleis eg plar ha det, fortel Soldal.