Laga klede og sko av boss
Design og redesign-gruppa ved Rosendal Ungdomsskule arbeidde måndag med å gje nytt liv til plast og syntetiske tekstilar. Dette med god hjelp frå læraren Marian Thunold og kunstnaren Pippip Ferner.
Elevane var i full gang med arbeidet med å lage klede og tilbehøyr av plast og syntetiske tekstilar då Grenda kom på besøk. Sjølv var kunstnaren Pippip opptatt med rettleiing av elevane. På laurdag er det nemleg utstilling på Galleri G Guddal, som skal ha fokus på marin forsøpling, plast og forbruk. Der skal både kunstnaren stilla ut sjølv, i tillegg til at elevane sine verk skal visast fram.
Plasten og tekstilane har elevane delvis funne sjølv, medan resten var plukka av Pippip ved hennar heimstad i Asker. For eksempel dei oransje sommarkleda redesigna av Emma Louise Høisæther Kolltveit og Kine Guddal Andersson var laga av vestar Pippip hadde funne etter at ein lastebilsjåfør brukte dei til å vise enden på lasta og mista dei.
Annonse
Flasker og Pringles
Pippip er klar på problemstillinga rundt boss, produksjon og forbruk. For i kleda som vart laga var både plast og syntetiske tekstilar representerte, noko som er verstingane blant forsøplinga av naturen.
– Ynsket er at elevane skal få eit meir bevisst forhold til bruken av plast og forbruk generelt. Blant anna overproduksjonen av tekstilar, der overfloda hamnar i naturen, er ein av agendaene bak prosjektet, seier Pippip Ferner.
Gjøa Marie Bondhus og Mathilda Valvatna Kristiansen var blant dei som hadde sett av dagen til redesign. Ved bruk av blant anna flasker og ein Pringles-boks hadde dei laga sandalar. Dette i tillegg til ein flaske-haldar med utgangpunkt i materiale dei sjølv hadde funne i Rosendalsområdet.
Annonse
Kreativiteten mangla ikkje blant elevane, og det var tydeleg at ungdomane fekk større bevisstheit rundt forsøpling i løpet av prosjektet. På laurdag er det duka for catwalk i Guddal, og Linnea Enes er ei av dei som gler seg til å visa fram den rosa toppen laga av eit badedyr. Denne med inspirasjon frå ein hatt Pippip hadde laga.
Utstilling
Etter utstillinga på galleriet, vil elevane sine prosjekt vera å sjå på Folgefonnsenteret i Rosendal.
– Det har vore lærerikt, fortel Linnea Enes.
Ho har god kontroll på kva som skjer når mykje plast blir kasta, kanskje takka vere prosjektet.
Marian og Pippip stilte gladeleg opp på bilete. Då iført ein genser av strikka plastposar og ein syntetisk duk. Hattane vart laga av elevane Eirill og Malin, medan brillene Marian nyttar var laga av Johanna. Det var tydeleg at elevane og lærarane fann inspirasjon i kvarandre.
