Laga gigantisk lydskulptur
I helga går andre versjon av festivalen «Vestafor» av stabelen. I år starta dei med ein verkstad i lyd for barn.
Publisert
Sist oppdatert
Torsdag var fyrste samling, og med eit tomt golv i kinosalen på Samfunnshuset var det nokre som lurte på kva dei skulle spela musikk på.
Instruktørane Gusten Aldenklint og Gabriel Edvinsson kunne då fortelja at instrumentet skulle dei bygga sjølve.
Annonse
Fredag føremiddag kunne ein tydeleg sjå at både barn og instruktørar hadde jobba på, då det var reist eit unikt meisterverk laga av ståltråd, trepinnar, teip og anna.
– Kva held de på med her?
– Nei, kven veit, lo kunstnar og instruktør Gabriel Edvinsson.
– Vi kallar det ein slags lydskulptur. Saman har vi bygga denne skulpturen sidan i går, og seinare skal vi setja på mikrofonar på dei ulike delane og spela konsert.
Annonse
Heilt improvisert
Edvinsson og Aldenklint har heldt nokre slike verkstader før, og resultatet har alltid vore vidt forskjellig.
– Det blir veldig improvisert, fordi dette er jo eit heilt unikt instrument som vi har bygga sidan i går. Det er heilt umogleg å få det til å høyrast likt ut kvar gong ein spelar på det, så det blir veldig fint å høyra resultatet, fortalde Edvinsson.
Ungane har gjort mesteparten, med god hjelp frå dei to instruktørane. Når bladfyken var innom sat dei og teikna bilete.
– Desse bileta skal symbolisera ulike delar av komposisjonen. Under konserten skal ungane halde dei opp, spele på instrumentet med pinnar og leike seg, fortalde Edvinsson, og la til;
– Nett no har vi ikkje høyrd så mykje på kva som skjer når vi speler, vi har berre bygga. Det skal bli artig å høyre denne lydskulpturen.
Annonse
– Korleis vart du oppteken av lyd i kunsten din?
– Godt spørsmål, korleis blir ein det? Eg trur det har vore ein lang serie av å sei ja til ting som har ført meg til nye ting og så plutselig var eg her, sa Edvinsson.
Annleis og kjekt
Blant dei om lag 15 ungane var Njål, som hadde teikna ein grøn teikning til kveldens konsert.
– Den har ein god sida og ein litt mindre dårleg. Eg tykkjer vi skal visa den betre sida under konserten, sa han.
Njål går på fleire fritidsaktivitetar, og likte seg på lyd-verkstad då det ikkje var likt det andre han har prøvd.
Annonse
– Eg brukar gå på fotball, volleyball og litt skyting. Eg vil seie at å laga denne skulpturen og spela konsert er veldig annleis og kjekt, fortalde han.
