Lærte å improvisera

Om ikkje Rosendal skulekorps og Rosendal musikklag kjem seg til Ohio med fyrste, så kom i alle fall Ohio til Rosendal. I helga var det seminar for å førebu den store konserten som går av stabelen 10. juni.

Bandet Ohio har veldige ambisjonar for konserten som no berre er vel éin månad unna. Fredag til søndag vart skulekorpset trimma i improvisasjonskunsten, medan musikklaget berre var med den siste dagen.

– Vi viser spesielt dei unge, men også dei eldre, korleis dei kan dyrka improvisasjon og leik i musikken. Ein blir tidleg lært at det må vera eit system, men det gøyaste å læra seg er å bli fri. Dei aller yngste har lettast for å ta til seg dette, men dei gamle kjem seg dei også. Eg merkar at dei har teke kvantesprang sidan vi starta. Ljosa har gått opp raskare enn vi kunne forventa, fortalde Hans Olav Ingholm i Ohio.

– Det har vore veldig gøy, la han til.

 

Marcus og Martinus

Han hugsar sjølv veldig godt då han knakk koden til improvisasjon.

– Det var ei enorm kjensle då eg oppdaga det, ein føler seg nærast uovervinneleg. Å få sjå andre oppleva det same, er fantastisk artig, smilte Ingholm.

På konserten skal korpsa framføra litt annleis type musikk enn dei til vanleg spelar, det er meir rytme i det. Ingholm lovar både eigenkomponert materiale, og meir kjent musikk omarrangert for anledninga. Rosendelingen Sebastian L. Torjusen er dirigent. Blant dei som skal opptre er også Freelance-trompetist og Ohio-medlem Stig Espen Hundsnes, som spelar med dei superpopulære Marcus & Martinus til vanleg.