Kvinnherad bibliotek fryktar for kulturlivet på Husnes

I eit svar på brevet om kartlegging frå kommunen skriv leiinga på biblioteket at «dette er veldig synd for kulturlivet her på Husnes!»

Dei fryktar store parkeringsproblem for sine brukarar. Mange av dei som brukar biblioteket oppheld seg der lenge, og å stå parkert i fleire timar kan fort bli dyrt. Bibliotek er meint å vere eit lågterskeltilbod, og å kome der skal vere gratis.

«Når biblioteket vart bygd i 1988 vart det brukt 200 000 på parkeringsplassar ved Aksen. No verker det som om desse parkeringsplassane er i bruk av tilsette og brukarar av tenestesenteret. Kor skal biblioteket sine brukarar og tilsette stå?», skriv dei i brevet.

Biblioteket har rekna på kostnadene for dei tilsette, og kome fram til ein meirkostnad på 22 000 i parkeringsavgift i året for å gå på jobb, og etterlyser klart merka reserverte parkeringsplassar for biblioteket og kultursenteret sine brukarar, i tillegg til reserverte plassar for tilsette.

Peikar på løysingar

Dei tilsette på biblioteket treng minst 5 parkeringsplassar, men det er verre å seie kor mange dei treng til brukarane. Dei kan ha mykje eller lite besøk, det kjem heilt an på om det er arrangement eller høgsesong.

Biblioteket har kome med fleire moglege løysingar, som eit vesentleg betre kollektivtilbod, gratis buss for syklistar som må gjennom Halsnøytunnelen, betre brøyting om vinteren og dusj på huset for dei tilsette som syklar.

Dei uttrykker òg ein frykt for at det skal bli så pass mange feilparkeringar at utrykkingskøyretøy ikkje skal komme seg frem.