Snart går fristen ut: Stem på Årets namn 2023

Det er tre finalistar i kåringa av «Årets namn i Kvinnherad 2023». Har du ikkje røysta enno, så hugs at siste frist er onsdag klokka 09.00.

Som kjent prøvde Grenda ein ny variant i kåringa av årets namn. Vi starta med ein utslagsrunde, der folk den siste halvtanna veka har kunna røysta på sin favoritt blant 16 utmerka kandidatar. Det har vore eit kolossalt engasjement kring kåringa, og det har tikka inn ein god del fleire røyster enn nokon gong tidlegare.

No er det bestemt at ein av desse tre blir den 14. vinnaren av årets namn-kåringa:

* Halsnøy J17, som imponerte med å koma heilt semifinalen i Norway Cup, i tillegg til å vinna serien.

* Lars Wang, den blide bussjåføren som er svært populær blant små og store heilt frå Mauranger til Husnes, og vidare med.

* Johannes G Eide, som gjennom ei årrekke har teke vare på gamle båtar og andre ting av lokalhistorisk verdi. I sommar opna dessutan Halsnøy historiske senter i Høylandsbygd.

Kom nærast

Vi kan røpa at kandidatane som kom nærast å sikra seg plass i finalen, var volleyballspelaren Lars Kristian Ekeland, Brøddamo Trude Beckholdt og forkjemparen for kreftomsorg Astri Måkestad.

No vert det altså ein ny runde med røysting, men med berre tre alternativ. Siste frist er onsdag 27. desember klokka 09.00.

I utslagsrunden kom det inn mange røyster der avsendar berre hadde skrive opp førenamnet sitt. Vi gjer merksam på at i finalen er reglane beinharde; alle røyster der avsendar ikkje har oppgjeve både fornamn og etternamn vil bli vraka.

Som alltid oppmodar vi folk til å røysta på den kandidaten dei meiner fortener tittelen mest, uavhengig av geografi, kjennskap og andre tilhøve.

Vinnaren vil bli presentert i Grenda torsdag 28. desember. Vi ynskjer alle tre kandidatane lukke til!