Kunstjakt i Kvinnherad

Det er ikkje gjeve at alle veit kva geocaching er, og som såleis ikkje ser samanhengen mellom dette, ein emneknagg og hovudjakt. Men geocaching er ein aktivitet som kan samanliknast med orientering, der ein finn fram til ulike postar, eller «cachar», ved hjelp av GPS i staden for kart og kompass.

Det er plassert ut over 3 millionar slike cachar over heile verda, og i 2020 var det registrert over 90.000 slike i Norge.

#finnhodet

Emneknaggen finnhodet treng mogleg også ei lita forklaring. Den engelske versjonen av knaggen er hiddenhead, og i liknande stil som både orientering og geocaching, er også desse emneknaggane med på å oppmoda nyfikne menneske til å leite etter noko spesielt på ein spesiell stad.

Der i blant Anita Osmundsen.

«Kunstnaren Christian Sunde har laga mange små hovud og plassert rundt om i Norge og verda. Finn du eit, bruk #finnhodet og #christiansunde og #plassen. Me er heldige som har eit på Husnes.» skreiv ho på Facebook då ho hadde funne hovudet.

Med teksten la ho ut bilete av funnet, utan å røpe nøyaktig kor det vart funne. Grenda slo på tråden for å høyre litt meir om opplegget, og Anita fortel.

- Det var ikkje lett å finna. Eg trudde det var stort, men det er ikkje større enn 1,5-2 centimeter. Det er limt på ein stein, og festa slik at det ikkje er noko ein berre slumpar over. Ungar går jo meir rundt og undersøker når dei er i naturen, men eg måtte iallfall leita ei stund før eg fann det, fortel ho.

Berre ein brøkdel er dokumentert

#finnhodet er eit prosjekt som hadde sin debut på Instagram i 2017. Men hovudprosjektet til Flekkefjord-kunstnaren Christian Sunde er langt eldre enn som så.

«Det første hovudet sette eg opp for lenge, lenge sidan, og etter kvart har det blitt mange av dei både i Norge og rundt omkring i verda. Det er berre ein brøkdel som er dokumentert i prosjektet #finnhodet, men det dukkar stadig opp nye tilskot.» skriv Sunde sjølv om prosjektet.

Ved å følgje kunstnaren på Instagram kan ein få hint om kor ein skal leite for å finne desse, og samstundes sjå kven andre som går på hovudjakt. Det var dette Osmundsen tok del i.

Mjelkhaug, Malmangernuten og Kaldaneset

- Eg har sjekka ut emneknaggen på Instagram, så eg veit at det iallfall er funne eit hovud på Mjelkhaug og eit på Malmangernuten, fortel Anita.

Det ho sjølv fann fram til har Opsangervatnet som utsikt, der det taust og uttrykksfullt heng på Kaldaneset.

- Eg tenkjer dette sikkert kan vera kjekt for barnehagar og slikt, det er iallfall greitt å ta med seg ungar dit, føreslår ho.

Osmundsen avslår venleg forslaget om å bli med Grenda på tur, men gir samstundes nokre tips om kor hovudet heng.

- Du må iallfall gå over brua, seier ho, og ynskjer lukke til.

Som biletet øvst i saka viser, vart hovudet på Kaldaneset funne.