Kunstig intelligens er tema på neste møte i senioruniversitetet

I februar i år snakka professor Ragnar Fjelland til Kvinnherad Senioruniversitet om kunstig intelligens.

– Han snakka då om kva datamaskinene kan gjera, og kva gjer dei med oss. Han er filosof og trakk linene langt tilbake, og dvelte ved ei samanlikning mellom datamaskiner og den menneskelege hjerne og natur, skriv Steinar Haugan innleiingsvis i ei pressemelding i samband med føredraget.

Med det trekkjer han linjene vidare til temaet Gaute Lund skal snakka om.

– Kunstig intelligens (KI/AI ) er i vinden som aldri før. Gjesten vår denne gongen er datagründer og seniorkonsulent frå iTeam, Gaute Lund. Han er også kjend som ei fargerik stemme i lokalpolitikken og ein framifrå pedagog, påpeikar Haugan i pressemeldinga.

Skjer mykje

– Det skjer så mykje, så raskt på dette feltet no at det er svært spennande og krevjande å følgje med på, siterer han Lund på.

Lund vil sjå på kvar denne teknologien kjem frå. Kvifor er det så veldig i vinden for tida, kva er det siste nye som skjer og kva kan kome i nær framtid, og kva vil det bety for oss vanlege kvardagsmenneske?

– Han lover ein del tips og triks, og vil svara på spørsmål frå salen. Me gler oss, slår Haugan fast.

Etter føredraget vert det sosialt samvære og enkel servering i foajeen.

– Senioruniversitetet er ope for alle som har lyst og høve til å møtast om eit aktuelt emne, på ein torsdag føremiddag, understrekar Steinar Haugan i styret i Kvinnherad Senioruniversitet.

Møtet med forfattar og journalist Agnes Ravatn 19. september måtte avlysast grunna sjukdom. Kvinnherad Senioruniversitet har lukkast å få ein ny avtale med ho på møte i Rosendal 20. mars i 2025.