Krise hos Torn & Rose i Eventyrland

– Eventyrland har begynt å mista magien sin, og det er like før det er snipp snapp snute for alle dei underfulle skapningane som bur i landet bortom stjernestøvet. For å vekka opp att folk sin kjærleik for eventyr inviterer tvillingane Torn og Rose publikum til omvising i Eventyrland for aller første gong!

Dette er inngangen til teaterstykket som vitjar Kulturhuset Husnes 18. oktober.

Torn & Rose i Eventyrland er eit samarbeid mellom Nordland Teater, Teatret Vårt (Møre og Romsdal) og Teater Vestland. Opp-prøving og produksjon av scenografi og kostyme har skjedd i Nordland, sidan Teater Vestland våren 2023 var på flyttefot til Nynorskhuset. Torn & Rose har allereie vore på turné i Nordland, og har Vestlandspremiere i Førde 12.-14. oktober.

– Etterkommarane etter ein av Eventyrlands mest kjende dronningar har planlagt ein morosam og actionfylt dag i Torneroseslottet, men underlege ting begynner å skje. Saman med publikum må Torn og Rose kjempe sitt livs kamp for å redde Eventyrland. På vegen støyter dei på gode feer, alvedronningar og magiske havskapningar - og ein heilt levande drake. Dei eldste teatertriksa i boka blir blanda med den aller nyaste teknologien for å gi publikum ei teateroppleving Europa aldri har sett maken til, melder teatersjef Cecilie Grydeland Lundsholt i samband med framsyninga.

Ho har lånt referansar frå mellom anna Snøkvit, Askepott, Tornerose og Jack og bønnestengelen. I tillegg møter publikum nye skapningar som Alvedronninga, Havsens herskerinne og ein drage som heiter Drakora. Grydeland Lundsholt har òg regi, og ho har ønskt å skape ei fengande historie som publikum både ler og blir rørt av.