Konsert og diskotek som positivt dugnadsarbeid
I samband med deltaking i Norway cup i sommar, inviterer Roald Tveit Nissestad og Rosendal Turnlag gutar-13 til diskotek og konsert laurdag 25. mai i Rosendal Samfunnshus.
– Eg kom i hug mi eiga tid frå fotballen, at vi heldt vellukka diskotek på Husnes for å samla inn pengar. Dette er grunnlaget for ideen, då ein slik kveld forhåpentlegvis gjev både foreldre og spelarar meir, enn det å selje dopapir og kjeks, seier Roald.
Kvelden byr på diskotek med DJ Edgar Bakke og konsert med artist Nanna Sofie Fredheim.
Annonse
– Eg svara ja då eg tykkjer det er fint å bidra til ei god sak. Det blir spennande å syngja for eit anna publikum enn eg er vand med, seier Nanna.
Begge artistane bidreg gratis til arrangementet, og noko av overskotet går til Redd Barna.
– Grunna vi har fått tak i gratis underhaldning, ynsker vi å gje noko samfunnsgagnleg tilbake, seier Roald.
Positive tilbakemeldingar
Annonse
Foreldra stiller opp på dugnad som vakter og kioskvertar, og det har utelukkande vore positive tilbakemeldingar.
– Vi ynskte å lage ein sosial kveld for ungane, samt skape minne og byggja relasjonar på tvers av bygdene. Eg er spent på kor mange som kjem, og dersom dette blir ein suksess vil vi halda fram med dugnadar på denne måten i framtida, seier ein vonfull Roald.
Alle born i 5. til 7. trinn frå heile Kvinnherad er velkomne.
