Kom deg ut med Barnas Turlag

Tema for markeringa nasjonalt er «Heile Norge bålar». Kvinnherad turlag feirar med «Kom deg ut-dag» med grilling over bålpanna og eit større bål om det vert vêr til det.

– Vi hadde jo håpa på snø og skileik sidan vi skal vera i Tveitedalen, men vi får sjå kva vêr vi får. Uansett blir det ein kjekk dag for store og små, fortel leiar i Kvinnherad Barnas turlag Mona Irene Eikemo Røstbø.

Ilag med IL Ternen inviterer Kvinnherad Barnas turlag til leik og moro rundt Ternebu denne dagen.

– Vi har to «kom deg ut»- dagar i året, som regel i februar og september. I fjor kom det over 80 til Hestasletto i Rosendal og 100 stykke til Husnesparken på arrangementa våre. Det er veldig kjekt, seier Røstbø.

Kjekt for store og små

Laurdag 18. januar kan du ta med familien og grilla pølser og leika ilag med andre familiar.

– Kiwi har vore så snille og sponsa oss med pølser, så dei skal ungane få grilla over bål-panna. Og så kjem kanskje Turbo ein tur også, fortel Røstbø.

Ho vil gjerne at folk skal finna meir glede i naturen og sjå at det er mykje ein kan gjera i nærområdet.

– Vi håpar på litt auka aktivitet ved arrangementa våre, og at fleire får augene opp for kor kjekt det er å vera ute, seier ho.

Tips

Treng du nokre tips til korleis få familien med ut? Mona har tipsa klare;

– Legg lista lågt! Ein treng ikkje reisa så langt eller vera ute så lenge.

– Erstatt kveldsmaten rundt bordet inne med eit måltid ute i naturen.

– Når det er mørkt ute og ein tenkjer ein skulle vore ute; hugs at ungar synest «hovudlykt» er kjempespennande!

– Invitér med andre familiar eller vener og gå ilag.

– Ein treng ikkje ha eit stort opplegg. Ungar aktiviserer seg sjølve ganske bra når dei er utandørs.