Klare med haustprogram i Kvinnherad Senioruniversitet
Stor oppslutning om programmet det siste året har gitt senioruniversitetet energi til å setja saman eit utviklande og interessant pensum for det neste semesteret.
Publisert
– Etter fulle hus og god stemning hausten 2023 og våren 2024, har styret i Kvinnherad Senioruniversitet forventningar til eit godt nytt semester. Programmet er klart, så det er berre å notera seg tid og stad og bli med, lokkar Steinar Haugan i styret for senioruniversitetet.
Den tidlegare rektoren er ikkje framand for å ta i bruk nye lokale som klasserom for etterutdanninga av seniorar – og andre.
Annonse
– Grunna stor pågang på Kulturhuset Husnes, skal me i haust i eit par høve, nytta Gry Helges restaurant. Det vert noko nytt, men me trur det skal gå veldig greitt, meiner Haugan.
Ravatn og Lund
Første førelesing blir 19. september på Gry Helges, og forfattaren Agnes Ravatn er gjesteundervisar. Ho er fødd i Ølen, bur i Valevåg og har gitt ut ei rekke populære og kritikarroste romanar.
– Ho er også ein røynd journalist, ein skarp iakttakar og skriv frodig og morosame kommentarar til dagens samfunn, påpeikar Haugan.
Annonse
Ravatn kjem for å fortelja om forfattarskapen, skriveprosessen og livet på bygda.
– Agnes hadde lyst til å ha ein «samtalepartnar». Me har vore så heldige å få Hilde Svalbjørg til å ta denne utfordringa, opplyser Haugan.
17. oktober har dei møte i Rosendal, med temaet er kunstig intelligens.
– Me har fått den særs oppegåande datagründeren, tidlegare politikar og pedagog Gaute Lund til å ta tak i dette høgst aktuelle temaet, seier Haugan.
– Me skal sjå litt på kvar teknologien kjem frå, kvifor det er så mykje snakk om det no, kor er me på veg og kva det vil bety for oss vanlege kvardagsmenneske, er Lund sine ord om føredraget.
Folgerø og Tuastad
Annonse
14. november kjem forfattar, musikar og journalist Halvor Folgerø til møtet i Rosendal. Han har hatt stor suksess med bokserien om Vestlandsvegar. No er det like før utgjeving av ei ny bok og han vil fortelja om «Ferjefolket».
– Han har møtt ferjefolk og samla historier på og med ferjene i Vestland. Om kvardagsliv, komikk, romantikk og dramatikk om bord, utgreier Haugan.
Han avsluttar semesteret 5. desember på Husnes med såpass brennbare tema som dei to pågåande krigane.
– Me har vore heldig og fått tak i husnesing og midtaustenkjennar Dag Henrik Tuastad. Han er tilsett som forskar og førstelektor ved universitetet i Oslo. Temaet hans denne dagen vert: «Den Israelsk-Palestinske konflikten. Vegen til 7. oktober og vegen vidare», opplyser Haugan.
