Kjem for å fotografera bileta til Lul Krag

Rosendalstiftinga har nemleg hyra inn den kjende fotografen og biletkunstnaren Øyvind Hjelmen frå Stord. I veke 37 kjem han til Dinosaurhuset i Steinparken for å ta bileta.

Grenda har tidlegare skreve om Lul Krag-prosjektet og deira ynskje om å bringa Lul Krag heim til Rosendal.

– Rosendal sjåast på som ei kulturbygd, og å løfta fram Lul Krag vil berre vera med på å ytterleg forsterka Rosendal som kultursenter. Ei bygd som ser, verdset og tek vare på kulturarva si, sa Knut Sellevold den gong.

No skal dei altså starta arbeidet med å samla inn og fotografera verka til Krag som finnest rundt i private stover. Dei vil òg bruka bileta som heng i samfunnshuset, på Rosendalstunet, i kyrkja og på Valen sjukehus. I tillegg har dei fått tilgang til å bruka bilete som er trykt i ulike publikasjonar og bøker om Lul Krag, og har hatt god kontakt med Nasjonalmuseet og KODE i Bergen.

Til no har prosjektet fått god respons frå publikum og har registrert om lag 150 bilete i privat eige. Dei fleste kjem frå Kvinnherad, men dei har også høyrd frå folk rundt om i landet som er interesserte i Lul Krag.

Øyvind Hjelmen vil ta bilete frå tysdag 12. september, og ein kan levera inn sine bilete frå og med måndag 11.september.

«Vi tek imot bilete frå og med måndag 11.september og har ope hus både tysdag og onsdag. Vårt håpe er at så mange som mogleg nyttar høve til å levera inn bilete måndag, slik at Øyvind Hjelmen har god tilgang til bilete når han startar fotograferinga tysdag. Dei som ikkje har høve til å levera måndag til onsdag, kan koma ein av dei andre dagane i veka etter avtale», skriv Knut Sellevold.

Dei vil også vera villige til å hente bileta dersom nokon ikkje kan levera sjølve.