Nytt tilbod på biblioteket
– kjekt å vera litt frampå
No kan både kropp og sjel få påfyll på biblioteket. Fredag startar dei tilbodet Yoga & Poesi med Lene Taranger. Biblioteksjefen likar å tilby noko nytt til publikum, og er spent på å prøva ut det nye konseptet.
– Me inviterer til å landa kropp og sinn med roleg yoga, med opplesing av dikt undervegs. Dette er eit høve til å finna ro etter ei travel arbeidsveke, står det å lesa på biblioteket sine heimesider.
Trude Hege Bergesen gler seg til å testa ut konseptet, og fortel at ein må vera tidleg ute med påmelding for å sikra seg plass på desse øktene.
Annonse
– Me har hatt påmelding, sidan det er litt avgrensa med plassar. No på fredag er det alt fullt, seier ho.
Lene Taranger er utdanna sjukepleiar og yogainstruktør, og vil rettleia deltakarane i avspenning, pust og yogastillingar. Ein kan ta del sjølv om ein ikkje har gjort noko yoga før. Det spesielle i denne yogatimen, er altså at det vert kombinert med høgtlesing, anten frå instruktøren sjølv, eller frå dei bibliotektilsette.
– Det er ikkje mange som har gjort dette før, men me har sett at nokon få bibliotek har tilbydd det, og då blir me jo litt inspirerte. Det er kjekt å vera litt frampå og ha nokre nyskapande tilbod, smiler Bergesen.
