Kåring av årets ord: - Minner oss om at me står sterkare saman

Hausten 2024 fekk alle husstandar ein brosjyre frå styresmaktene i posten med råd om korleis me innbyggjarar skal klara oss sjølve i ei vekes tid dersom ei krise råkar oss. Eitt av råda er å skaffa seg ein beredskapsvenn. Ein beredskapsvenn kan til dømes vere ein nabo som har plass til eit felles kriselager.

– Ordet beredskap forbind vi med noko alvorstungt, medan venn kan knytast til noko som er nært og kjært. I beredskapsvenn får me desse førestillingane i eitt og same ord, seier Dagfinn Rødningen, seniorrådgjevar i Språkrådet, i ei pressemelding.

Samfunnsutvikling

Språkrådet nemner også andre ord som har blitt vurdert til årets ord i 2024. Blant dei finn me tekstlikskap, popcorngras, tinderifisert, tilkaringsindustri, hundredagarshoste og djuphavsgruvedrift.

– Det er i stor grad samfunnsutviklinga som avgjer kva for nye ord som kjem inn i språket. Under koronapandemien fekk me mange nye ord, for situasjonen var ny og spesiell. I år ser me at det har kome inn færre nyord i språket, seier Åse Wetås, direktør i Språkrådet.

Årets ord blir kåra av Språkrådet i samarbeid med professor Gisle Andersen ved NHH, som seier at ordet skal vera aktuelt, levedyktig og ha høg språkleg kvalitet.

– Det er eit poeng å visa at norsk er eit rikt språk med eit stort ordtilfang som lett kan utvidast på gode måtar, seier Andersen.

Årets ord 2024 minner oss om at vi står sterkare saman enn kvar for oss, oppsummerer Språkrådet i pressemeldinga si.