Laurdag var det duka for juleverkstad i Ølve Ungdomshus. Her var det mykje kjekt å laga for både store og små.

Julestemning for store og små

Både store og små møtte til juleverkstad i Ølve ungdomshus på laurdag. Der var det pynta og klart til koseleg julestemning.

Redaksjonen i Grenda
Publisert

Det er første gong arrangementet vart halde i ungdomshuset, og seks ulike stasjonar sto klare for å gleda barn i alle aldrar. Allereie ved inngangen vart ein møtt med den gode lukta av juletre og gløgg. Julemagien var kome til bygda.

– Det var over 80 påmelde på Facebook. Det er stas og sjå så mange møte opp, seier Grethe Revne frå Hagelaget.

I samarbeid med ungdomslaget og fritidsklubben har dei fått juleverkstaden på plass.

Isa Maria Guddal Husby lagar julekrans og smilar til kamera.

Alle fekk julestemning

Kvar av dei hadde ansvar for to postar, slik at deltakarane kunne prøva seg på ulike aktivitetar. Arrangementet varte i tre timar, og til alle si glede vart det servert graut mellom slaga.

Trym Håvik Eikeland smilte medan han laga julelykt, med litt hjelp frå pappa på sida. Han kunne stolt fortelje at han i tillegg til lykta hadde pynta peparkaker.

Trym Håvik Eikeland og pappa Kristoffer Eikeland lagar lykt.

Ansiktsmåling, julekortlaging og ikkje minst pynting av peparkaker var nokre av aktivitetane på programmet. Familie og vener kan sjå fram til fine julegåver under treet i år.

Tekst og bilete: Hanna Jemtland

Det var over 80 påmeldte til juleverkstaden og arrangørane var nøgde med stort oppmøte.
Det var mange aktivitetar i Ølve ungdomshus denne laurdagen. Mamma Merethe Verpe tok med seg ungane og laga mellom anna julekort.
Nora Lie visar fram det flotte juletreet ho har laga.
Viktoria og Tuva Veggeland pyntar peparkaker.
Både store og små koste seg i Ølve denne laurdagen.
fritid kultur juleverkstad ølve
Powered by Labrador CMS