Julefest i Høylandsbygd
Høylandsbygd Bygdalag arrangerte tradisjonen tru juletretenning 1. søndag i advent. I år blei det ei litt spesiell markering med nye lys på Svartaberg, og eit «Juletre» som ikkje berre lyser godt for bygda; det viser òg godt heile vegen frå Ølfarnes til Porsvik.
Bygdalaget arrangerte fakkeltog frå Slettaneset med stopp i Hillestadkrysset, der det var nedteljing til lyset vart tend på den 193 meter høge toppen Svartaberg. Om lag 30 personar trassa det sure vêret med regn og vind. Toget gjekk deretter inn til bedehuset der heile 60 unge og eldre hadde samla seg for å kosa seg saman. Her blei det servert graut, kaffi og gløgg.
Høyåker-korpset deltok som alltid med flott julemusikk, og jammen hadde ikkje nissen òg trassa vêret og kom med godt humør og pakke til dei minste.
Annonse
Bygdalaget har òg tradisjon for julelotteri, i år heller ingen unnatak. Irene Engelsen blei den heldige vinnar av hovudpremien, som var ein flott utepeis.
Bygdalaget vil takka alle som var med og bidrog til eit flott arrangement, både med installasjon av juletre, gevinstar og loddkjøp, og ikkje minst bedriftene som har vore med og sponsa batteripakke, solcellepanel og belysninga på Svartaberg, som vil gleda oss alle no i førjulstida.
Høylandsbygd Bygdalag
Arne Bjørnevik
