Jonsokfeiring i Høylandsbygd
Fredag er det jonsokfeiring og offisiell opning av den nybygde gapahuken på badestranda i Høylandsbygd.
Publisert
Sist oppdatert
«Høylandsbygd har ei av kommunen si flottaste og best tilrettelagde badestrender. Vi har universelt toalett, utedusj, ei flott sandstrand, sandvolleyballbane, ny badeflåte og stor flott grillhytta som bygda si ordførarkandidat Vegard Bjørnevik vil offisielt opna på fredag», skriv Høylandsbygd bygdalag i ei pressemelding.
– Her er det god plass på land og i sjøen. Det har vore veldig mange folk her no i varmen, og det er ekstra kjekt at folk kjem frå heile øya, seier leiar i bygdelaget Arne Bjørnevik på telefonen til Grenda.
Annonse
Han håpar at mange vil ta turen på fredag for å sjå kva bygdelaget har fått til ved hjelp av både gåver og innsamla midlar.
– Vi har hatt eit stort dugnadsarbeid, og gjort ein kjempeoppgradering sidan sommaren 2022, både på stranda og på leikeplassen attmed, fortel Bjørnevik vidare.
Grunne totalforbod mot eld utandørs blir det diverre ikkje bål eller grilling denne jonsokaftan. Bygdelaget oppmodar difor folk om å ete middag heime, men garanterer 20 grader i vatnet, kaker og kaffi, basar og plass til alle.
