Inviterer til Ukraina-føredrag
I mai var ordførar Vegard Bjørnevik og Grenda-journalist Morten Nygård med THK-stiftelsen til Ukraina. 7. oktober held dei føredrag saman om turen.
Publisert
Sist oppdatert
Det er Rosendal Helselag som har invitert dei til å fortelja om turen, ein tur som vart grundig dokumentert i Grenda i vekene etter at ordførar og journalist var tilbake i Kvinnherad.
Bjørnevik var med og køyrte traileren til THK-stiftelsen inn i Ukraina, medan Nygård & Nygård køyrte ein bil SKL hadde donert til det gode føremålet. Når alt kom til alt, var det absolutt ikkje køyreturen gjennom Danmark, Tyskland, Polen, Slovakia og inn i Ukraina som var mest interessante.
Annonse
Møtet med innbyggjarane i det krigsråka landet, å vera vitne til tilhøva dei må leva under og å oppleva skjebnane deira, er av det som gjorde størst inntrykk. 7. oktober fortel dei i samtaleform om turen i Nyasago i Gurinefjæra.
– Det blir mykje bilete og ein del videosnuttar, seier Morten Nygård om føredraget.
Med på føredraget blir truleg også THK-eldsjela Tormod Myklebust, som har køyrt traileren ned til Ukraina årvisst, også før Russland angreip Ukraina. Med blir også Leif Nygård, som var med som sjåfør.
Morten Nygård skal etter alle solemerke preika mest, med innspel og betraktningar frå dei andre.
