Humor og julestemning med Daniel Kvammen: – Eg skal vera heilt ærleg med dåke; det er ikkje akkurat stygt her

Takka vera Rosendal kultur tok Daniel Kvammen turen innom Kvinnherad på sin aller fyrste juleturné. Valet falt på Gurinefjæro, der det er plass til 110 personar innomhus. Konserten vart utseld på få minutt, det same vart ekstrakonserten. Dermed var det i alt 220 heldige som fekk høyra Kvammen søndag kveld.

Omgjevnadane kunne ikkje blitt vakrare. Halvmånen lyste over fjorden, og rett før den fyrste konserten starta, var himmelen farga raud i vest. Rosendal kultur gjorde også sitt for å skapa stemning, ved å pynta med juleljos både langs vegen ned til Gurinefjæro og inne i lokalet. Utvendig var det tent i bålpanna.

– Det er kjekt å laga til noko for bygda, sa Ingve Hesjedal, leiar i Rosendal kultur, då han ynska velkomen.

Gå inn i seg sjølv

Så var det klart for duoen Daniel Kvammen (song, akusktisk gitar) og Birk Lindsjørn (tangentar, plystring). Dei opna med den vakre «Vikla inn i kvite spor».

– Veldig hyggeleg å få koma. Har alle det bra? spurde Kvammen.

Ja, svarte publikum lågt. Det fekk artisten til å åtvara om at han er litt nervøs av seg, og viss han ikkje fekk tydelegare svar, ville han gå inn i seg sjølv, og det lova han at publikum ikkje ville lika. Dermed vart sjølvsagt responsen mykje betre på neste forsøk.

Daniel Kvammen heldt fram med Alf Prøysen si klassiske «Julekveldsvise» (No har vi vaska gølvet).

– Det er fyrste gong eg er på juleturné, og det er stort for meg å ta steget inn i Kurt og Sissel sine rekker, smilte Daniel Kvammen. Han la til at han i mange år har blitt spurd om å framføra noko spesielt kring juletider, og fann då ut at han like godt kunne laga sine eigne julesongar. Den fyrste skreiv han for ti år sidan, og handlar om kva meistringstaktikk han nyttar for å overleva julefeiringa heime.

– Det er hyggeleg å feira jul med familien Kvammen etter julemiddagen, men før det er det grufullt, flirte artisten. Taktikken hans handlar rett og slett om å gå ut i skytja og kløyva ved medan dei andre pyntar treet.

Gjekk seg vill

I det heile baud Daniel Kvammen på mykje humor mellom songane. Mellom anna fortalde han den sanne historia om då han fekk vera med faren på hyttetur på Hardangervidda for aller fyrste gong. Dei gjekk og gjekk i timevis i tausleik, men til slutte måtte faren ta ordet for å vedgå at han ikkje visste kvar dei var. Det enda med at dei måtte overnatta ute utan sovepose og telt, berre for å oppdaga neste morgon at hytta låg 50 meter unna.

Den 36 år gamle musikaren frå Geilo legg ikkje skjul på at han er glad i naturen og å gå i fjellet.

– Eg skal vera heilt ærleg med dåke; det er ikkje akkurat stygt her. Rosendal må vera ein av dei finaste stadene i Norge, sa Kvammen, som også var i bygda i sommar då han spelte på Baroniet.

Publikum fekk elles servert songar som «Den tyngste turen» og ein norsk versjon av «Last Christmas». Konserten slutta med Hellbillies-klassikaren «Den finaste eg veit». Ekstranummeret var passande nok ståande allsong av «Deilig er Jorden».

– Når eg står her oppe er dette verdas kulaste jobb. Eg set heilt enormt pris på at de kom og høyrde på, understreka artisten.

Frå løer til kyrkjer

Turneen består av heile 27 konsertar på 20 dagar. Dagen før var duoen, som jobbar 12-15 timar kvar dag i denne perioden, på Lofthus.

– Gimmicken var eigentleg å halda konsertane i bygdehus rundt omkring. Men vi har vore i alt frå løer til kyrkjer. Lokalet her er heilt fantastisk. Vi ynskjer å tilby opplevingar til folk på bygda, og ikkje berre i Trondheim, Bergen, Oslo og dei andre store byane. Den eldste som har vore og høyrd på var 100 år, medan dei yngste har vore kring ti, sa Daniel Kvammen til Grenda etter konserten i Gurinefjæro.

Han røpa elles at han jobbar med fleire nye plater samstundes, men reknar ikkje med det blir noko ny ordinær utgjeving før i 2026.

– Det kan òg henda det blir ei juleplate ein gong, legg han til.

Joggetur

Kvammen slo stadig fast at han likte seg i Rosendal.

– Rosendal er vel godt vane med mange konsertar. Det er utruleg kjekt å spela her, og eg er blitt veldig glad i bygda. Det er ein fantastisk fin stad. Tenk det; ei kulturbygd midt inne i ein fjord, smilte han.

– Har du gått til fjells her?

– Nei, det har ikkje blitt tid til det, men Ingve snakkar om at vi kanskje skal ta ein joggetur i morgon. Då prøver vi kanskje på ein topp, sa artisten som dagen etter skulle spela konsert på Karmøy.