Høgtideleg opning av ny gapahuk

«Opninga vart ei gild kulturell og sosial stund med nyskriven tekst av Svein Rimestad på melodien til «Part of the Union». Ein trombone-duo med Knut Steinsletten og Lars Myklebust overraska alle med sine innslag. Alt var nøye planlagd og gjennomført. Eit aggregat skaffa straum til vaffelsteikinga. Den beste kokken i gruppa, Jostein Grov, sytte for at alle fekk velsmakande vaflar med rørte blåbær- og tytebærsyltetøy på. Bæra vart plukka i området rundt ein liten halvtime før markeringa tok til. Betre kunne det ikkje bli», skriv Kristian Bringedal på nettstaden Uskedalen.no.

Lang merittliste

Arbeidet på Klepp er gjort av den relativ ferske Dugnadsgruppa. Men gjengen har allereie ei imponerande merittliste:

* Murarbeid og rydding på kunstgrasbanen.

* Skilting og rydding av sti.

* Arbeid på Heio med mellom anna renovering av garderobehuset.

* Arbeid på Stemneplassen ute og inne.

* Vedbu på hytta Fjelly.

* Gapahukane på Klepp og på Flåtene.

«Dugnadsgruppa har laga seg plan for hausten. Nye prosjekt ventar til glede og nytte for alle som bur og ferierer i denne bygda. På Klepp finn vi tre synlege stølstufter. Det vart difor snakka om på heimveg om torsdagens storhending kunne vera starten på ei årleg stølsvandring. Det er mange stølstufter i fjella rundt Uskedalen», opplyser Bringedal.