Her er opningsdiktet

Til den nye gangvegen i Herøysund

offisiell opning måndag 5. juni 2023.

No hender det ting her i bygda

til beste for deg og for meg

mange års venting er endeleg slutt

- det er ny gang- og sykkelveg!

For me går her, til skule og fritid

- men det har ikkje vore heilt trygt

i grøftekanten i mørke og regn,

men no - no er gangvegen bygd.

Ja, no kan me bruka beina

og forbetra vår helse-statistikk

Og sykla og gå til butikken

(Ja, om me hadde hatt ein butikk)

Dei har arbeidd fleirfaldige mån’ar

Dei har grave og skufla og sprengt

Og av og til var det trafikklys

Og av og til rett og slett stengt.

Her kom røyrar og grøfter og kabel

for vatn og fiber og straum.

Og bekkar og elvar er sikra

og tilpassa tusenårs flaum.

Så vegen vart slett ikkje billeg.

Det kostar med mann og maskin.

Men same koss prislappen ser ut:

Vegen vart steikjande fin.

Men på Haugen der går dei og ventar,

og må passa seg godt der dei trør

For svingen som før hadde graner

er minst like skummel som før

Kunne ein spart litt på vegen?

Det er uansett betre enn før.

Litt enklare standard, litt smalare veg?

Og kome seg litt lenger sør?

Så me ventar på neste etappe.

Og vonar at pengane finst.

At ein snirklar seg fram nokre svingar til

og kjem fram til Haugen – minst!

Og no skal me bruka vegen.

Me skal trilla og sykla og gå.

I kvardag og helgar og tidleg og seint,

så dei må leggja ny asfalt på.

Så vil me takka for vegen!

(Det var no på tide, i grunn.)

Takk til dei som bygde - og dei som betalte.

Med helsing frå Herøysund.

Øystein Skjæveland