Held sommarope i Vikjo

Anita jobba sine siste yrkesaktive år som lærar ved Rosendal ungdomsskole og er no pensjonert. Ho er likevel i full sving i kunstverkstaden med sine nye prosjekt, samstundes som ho ivaretek ei eldre mor. Attpåtil har det kome fleire barnebarn så det blei ikkje nett meir tid etter at ho pensjonerte seg.

– Eg har fått ein ny karriere som pensjonist, smiler kunstar og eigar av Atelier Fruktlageret Anita Gaassand, og legg til;

– Eg håpar kunsten min kan bidra til meir omsut for naturen omkring oss.

Atelier Fruktlageret

Anita og ektemannen kjøpte fyst nabohuset som feriebustad. Deretter kjøpte dei fruktlageret i 2008 og i 2015 var det ferdig renovert. Bygget står no i all si prakt i Vikjo og ein kan sjå at det er lagt ned mykje arbeid og kjærleik. Huset rommar ein kunstverkstad og eit atelier, samt eit lite hus dei kan leiga ut til sommarturistar.

– Det blei eit stort atelier, det største eg nokosinne har hatt. Eg er rett og slett misunneleg på meg sjølv, ler Anita.

Elin har jobba i mange år som dekoratør, og jobbar no sine siste yrkesaktive år som barnehagelærar, noko ho synast er særs givande. Elin har sjølv hatt atelier med keramikk i Bergen, men etter pandemien flytta ho båe verkstad og atelier til feriehuset på Hatlestrand.

– Eg håpar òg på ny karriere som pensjonist, ler ho.

No samarbeider dei om å ivareta ei sjuk mor og fann samstundes ut at draumen om å gjere noko saman endeleg kunne verkeleggjerast.

– Eg har stor plass her i atelieret og dei ulike prosjekta vi har krydrar kvarandre, seier ei nøgd Anita.

Ein kan sjå at ho er tiltaksam, då atelieret er fylt med mellom anna tekstiltrykk på både puter og handlenett ho har sydd sjølv, fleire akrylmåleri og dei nyaste akvarellane som er hennar siste prosjekt. Dette er eit verkstad der du kan sjå ein kunstnar i arbeid. To fargerike akvarellar er endå ikkje heilt ferdigstilte og står til mogning på kvart sitt staffeli.

– Det hender eg set meg i godstolen med ein kopp kaffi og studerer om måleriet treng noko meir, eller om det er på tide å gje seg, fortel Anita.

Dykk ned i bileta

Ein kan sjå at dei sprudlande systrene krydrar kvarandre. Båe har mellom anna med innspel frå havet. Anita fortel om sitt siste prosjekt om kyst og sjø der ho måler akvarellar med havbotnen som tema. Ho har eit stort miljøengasjement, og då ho prøvde ståande padlebrett oppdaga ho det spennande livet under havoverflata. Akvarellane er vakre og drøymande, og viser tydeleg det vi kan mista om vi ikkje får meir omsut og merksemd for naturen.

– Eg ynskte å dykka ned i denne verda, samt formidla ho på ein eventyrleg måte med fargar og optimisme. Som kunstnarar har vi fridomen til å kunna velja eit alvorleg tema, men framstilla det på ein positiv måte, seier Anita.

Det er ikkje alle akvarellane vi får sjå i sommar. Anita sparar nokre godbitar til kunstutstillinga ho skal ha på kunstmuseet i Nord-Trøndelag til hausten.

– Eg søkte på eit stipend og fekk med det ein studietur til Namsos. Her fekk eg stadfesting på at det eg trur på er viktig. Dei falt for bileta mine og eg gler meg stort til utstilling, seier ei audmjuk Anita.

Elin og Anita er å treffe i fruktlageret i Vikjo i heile sommar, og dei håpar at mange er nyfikne på arbeida deira og tek turen innom.