Heidra eldsjela Stråbø under Bergslagendagen

Bergslagendagen laurdag baud på eit rikhaldig og variert program, med høgtlesing frå «Nattklubben» av Mona Vetrhus, filmframvising av «Vi lyttar til havet» og song av Halsnøy Shantykor som nokon av programpostane.

Rosina i pølsa for dagen var kakefest for dugnadsgjengen, og som ei overrasking utanfor programmet låg det ein heider til ein av dei verkelege eldsjelene for Bergslagen.

Heider

Tidlegare kultursjef i Kvinneherad kommune Kristian Olav Bringedal var henta inn for å snakka litt om vegen fram til det som no er blitt Sunde kyst og litteratursenter. Han snakka også om det å vera frivillig, og gav ordet vidare til Randi Karin Tveit, som i tillegg til å vera etterkomar av båtbyggjar Andor Tveit, som selde arealet til nettopp det formålet det no har fått.

Ho retta raskt merksemda til ein som har gjort ekstra mykje frivillig arbeid for Bergslagen.

– Det har vore gjort eit stort og godt arbeid her i Bergslagen i mange år, og mange skal takkast for innsatsen. Den som eg vil gje ein ekstra honnør til i dag, er Kjell Magne Stråbø. Han har vore med i styret, og vore styreleiar i mange år. I tillegg har han vore ein drivande leiar av dugnadsgjengen, og sytt for at ein har fått det flotte arbeidet her gjort, sa Tveit.

– Du har ivra for kystkulturen og for at oppveksande generasjonar skal få vita kva kystkulturen har betydd for folk i bygdene og elles langt kysten, og korleis denne har avspegla seg i både dikting, kunst og handverk, ja i heile livet. Me hadde ikkje vore her utan ditt arbeid og utrøyttelege pågangsmot. Berre du sjølv veit kva dette har kosta av innsats, la ho til.

Tveit skildra han som smilande og blid, lun og god, og som eit ja-menneske.

– Mange gode ord er sagt om deg. Dine personlege eigenskapar har gjort deg ekstra passande til den jobben du har tatt på deg, sa Tveit om dugnadsinnsatsen til Stråbø.

Vidareutvikling

Han vart heidra med eit portrett av seg sjølv, teikna av Lars Slettebø.

– Eg måtte stundevis kikka meg rundt og undra meg over kven det var snakk om, byrja Stråbø takketalen sin med.

– Eg overtok som styreleiar i 2015. Då hadde me ikkje ført opp dugnadstimar i det heile til då. Sidan då har eg bokført 9600 dugnadstimar på gjengen, og eg veit at me har hatt mykje meir. Tusen, tusen takk til dugnadsgjengen som har vore med! Og Sundefolk: Me skal vera kjempestolte over det me har fått til, sa Stråbø med teikning og blomebukett i hand.

Då han fekk summa seg litt, og heideren var sokke litt inn, var konklusjonen klar:

– Dette var sterkt, heilt uventa og altfor mykje! Eg er så stolt over det me har fått til i lag, for dette er ikkje noko einmannsprosjekt. Eg har så tru på at dette kjem til å vera ein flott plass for Sunde og heile Kvinnherad for folk til å koma og møtast på. Dette er eit kultursenter for heile regionen, sa Stråbø til Grenda etter overrekkinga.

– Dette er ikkje for mykje for Kjell Magne Stråbø. Han har vore med i mange år, det var fint å ha både han og Kristian Olav Bringedal her, for dei har begge vore så viktige for plassen her og det ein har fått til. No gjeld det å halda fram å byggja den kystkulturen som er her, sa Jorun Larsen, som overtok stafettpinnen som styreleiar i sommar.

– Me skal utvikla oss vidare. Eit senter som dette er aldri ferdig utvikla, slutta Stråbø.