Hava (18) spent før russerevy: – Får ikkje sova om natta

Revysjefen har tatt på seg litt av ein jobb. Det går på nattesøvnen laus.

Russen har i desse dagar siste innspurt før det brakar laus i kinosalen på Husnes neste helg. Vi møter éi av dei to revysjefane, Hava Karin Eldi, til ein prat.

Ho har, saman med Leah Moe, hatt ansvar for å sikra at den tradisjonsrike russerevyen blir ein suksess også i år. Hava fortel at det ikkje har vore ein lett jobb, og at det er mange ballar i lufta.

Tøff rolle

Med hovudet proppa fullt av ting som må ordnast før den viktige helga, er det ikkje så rart at det går utover nattesøvnen.

– Eg får ikkje sova om natta. Eg har lege vaken til tre kvar dag dei siste vekene. Det er kostyme, bestillingar, planlegging av øvingar, og ei rekke spørsmål frå dei andre i russen. Då skriv eg det ned, og så prøver eg å sova igjen, men det er ikkje alltid like lett, fortel Hava.

– Korleis går det med skulearbeidet?

– Eg prøver å ikkje la det påverka skulearbeidet, men det er vanskeleg, svarar ho, som vedgår at ho gler seg litt til det heile er overstått.

Hava har dansa sida ho var lita, og har dermed god erfaring med å stå på scena. Ho kjenner ikkje mykje til nervene heilt enno, men trur dei vil koma like før sceneteppet går opp. Om lag 50 til 60 personar har engasjert seg i revylaginga. Av desse har det vore ei god blanding mellom jenter og gutar.

– Det er mange av desse som ikkje har stått på ei scene før, og eg veit at det er fleire som er ganske nervøse, seier revysjefen, som også jobbar med å trygga spente medelevar.

– Kontroversiell

Revyen har fått namnet «The Hangover» («Bakfulla» på norsk), inspirert av den amerikanske komedien med same namn.

– Innleiinga til revyen er henta frå filmen, men utover det så har ikkje namnet noko særleg betydning, anna enn at vi trengte eit namn, og at vi syntest «Hangover» passa bra til russetida, fortel ho og smiler.

Det viktigaste for årets russekull var at revyen skulle vera morosam.

– Det er derfor ikkje så mange seriøse innslag. Eg skal ikkje røpa for mykje, men det blir både dei gode gamle lærar-sketsjane og humorinnslag inspirert av Tiktok, kjendisar og aktuelle hendingar. Éin sketsj handlar om russebuss og éin annan handlar om sesjon, men meir kan eg ikkje seia. Ein får nesten berre koma og sjå, lokkar Hava.

– Kan du beskriva revyen med tre ord?

– Oi! Skal vi sjå. Eg trur eg må seia tidvis kontroversiell, basert på aktuelle tema og humoristisk, svarar ho på det.

Ikkje heilt i mål

Sjølv om revygjengen allereie har brukt mange timar på å øva, fortel revysjefen at dei ikkje er heilt i mål.

– Det trengst framleis masse jobbing for å få alle replikkane til å sitja, og så må vi køyra gjennom heile greia fleire gonger. Det er planlagt ein generalprøve, og så gler vi oss til å få prøva det ut på scena, seier Hava.

Sjølv om ho no gler seg til å bli ferdig, har arbeidet med revy også vore kjekt.

– Det har vore ei veldig gøy oppleving. Eg er stolt over den kreative gjengen. Dei har kome på morosame innslag, og har samstundes vore flinke til å hjelpa kvarandre. Som alltid er det nokon som dreg lasset meir enn andre, og eg er veldig glad for alle dei som er på alle øvingar og som tar dette på alvor, rosar Hava avslutningsvis.