Har du ein statist i magen? No kan du bli med i Ragnarok 3

Ragnarok er ein norsk fantasy-serie som baserer seg på Norrøn mytologi. Handlinga er lagt til den fiktive byen Edda i Hordaland på Vestlandet - ein by som er prega av klimaendringar og industriforureining frå fabrikkane som blir eigd av den lokale familien Jutul.

Dette er den siste sesongen med serien.

Skuleavslutting og bryllaup

Når den no skal rundast av er det nokre store scener i emning. Ei skuleavslutting som skal spelast inn 9. og 10. mai, og eit bryllaup som har innspeling den 11. mai. Innspelinga er såleis nært føreståande, og castinga er interessert i fleire statistar.

«Vi har bruk for mange statistar i dei dagane og dei skal helst vera frå 30-75 år. Dei skal ha lyst til å vera med oss, vera pent kledd, men elles har vi ikkje store krav.» skriv Stine Meldgaard frå produksjonen i ein e-post.

Dagane dei treng folk til er skuleavslutting-scena som skal spelast inn 9. og 10. mai. Timane ein må vera klar til å setje av er mellom kl 10.30-21.30.

Til bryllaupet har dei no alle statistane som trengs, opplyser Elisabeth Grøtte Kolstad, som står for castinga. Vidare kan ho røpa at det er fleire statistar som allereie har meldt seg frå Kvinnherad.

Dei som melder seg til skuleavslutnings-scenene må ha moglegheit til å stille begge dagane. Oppdraget er honorert, men ein må kome seg til og frå Odda på eiga hand.

Tidspunktet for sesongpremieren er enno ikkje klar.