Hadde trua på seg sjølve og vann

Om lag 40 store og små hadde tatt turen for å prøva seg i dei forskjellige greinene. Fyrst ut var papirflykonkurransen, og då måtte kvar av deltakarane bretta seg tre fly. Målet var å koma så nært ein bruskasse på golvet som ein kunne.

Frå oppe på hemsen var ordføraren fyrste mann ut, og han leia lenge konkurransen. Til slutt nådde han ikkje heilt opp på pallen, noko som kanskje var lika greitt sidan det var han som delte ut premiane.

– Eg har jo blitt ein slags papirflyguru i denne kommunen, så eg har drive å bretta litt og sett på diverse teknikkar. Så at eg ikkje kom lenger enn på fjerde plass i dag var faktisk litt trist, sa Vegard Bjørnevik med glimt i auga.

Han var med i papirflykonkurransen på Kvinnherad Arena under Barnas dag i oktober, og har sidan blitt glad i sporten.

– Papirfly er jo blitt ei greia. Det er veldig gøy, og om nokon vil ha meg med på eit arrangement er det berre å arrangera papirflykasting, då kjem eg, lo han, og la til;

– Eg vart veldig imponert av den vippeteknikken vi såg her i dag, den skal eg etterlikna neste gong.

Dels flaks, dels manifestering

Vinnaren av papirflykonkurransen vart Avrora (11). Ho hadde ikkje tenkt ut ein spesiell teknikk, men meiner at ho vann fordi ho hadde trua på seg sjølve.

– Eg hadde ikkje trudd at eg skulle vinna, men eg tenkte «eg klarar dette», og så gjekk det, fortalde ein nøgd vinnar.

Har du øvd på førehand?

– Nei, eg berre bretta alle flya to gonger og forsikra meg om at spissen faktisk var spiss. Så kasta eg og håpa, sa ho.

Etterpå var det klart for å stabla bøker. To mot to skulle stabla eit så høgt tårn dei berre klart på eit minutt. Medan bladfyken var på staden vart ein av stablane så høg som 65 cm.