Gullvåg til Galleri G Guddal
Han var den første kunstnarane Gøril Guddal stilte ut i det nye galleriet sitt Guddal i 2014. No kjem han tilbake med utstilling i samband med jubileumsåret hennar.
Publisert
Sist oppdatert
Då Gøril Guddal satsa tungt og bygde låven på heimegarden i Guddal om til galleri, var biletkunstnaren Håkon Gullvåg den som fekk æra av å innvia den nye gallerilokalet Såleis passar det veldig godt at han kjem tilbake med ny utstilling i jubileumsåret for Galleri Guddal.
Dronningven
Annonse
– Det er sjølvsagt stas å få til ei ny utstilling med denne kunstnaren, smiler Gøril Guddal før utstillingsopninga fredag 21. juli.
Håkon Gullvåg stiller med maleri og grafikk, og kjem til å vea til stades på opninga. Der vil han få høyra musikk ved Jeanne Marie La France (sopran), Carl Bruno Bodin (tenor og gitar) og gjester.
– Gullvåg har fått mykje fokus på sine forsøk på å fornya portrettsjangeren gjennom sine leveringar av ei rekkje offentlege portrettoppdrag, eksempelvis Kong Harald V og Dronning Sonja, høgsterettsjustitiarius, statsminister, forfattarar, skodespelarar, musikarar og fleire, skriv Gøril Guddal i ein omtale av den komande utstillinga.
Dronning Sonja har vore ein uttalt beundrar av denne kunstnaren, og då han hadde utstillinga i Guddal i 2014 kom ho eins ærend i kongeskipet «Norge I» og hadde med seg eit lite følgje opp til Guddal for å sjå på utstillinga. Det var det første av etter kvart fleire vitjinga majesteten har hatt til galleriet.
Annonse
Internasjonalt merittert
64-åringen frå Trondheim debuterte i Galleri Dobloug i Oslo i 1983, eit galleri som har vore hans faste galleri i Oslo sidan.
– Etter debuten følgde stor utstillingsaktivitet i Norge og internasjonalt gjennom meir enn 40 år. Parallelt med dette har Gullvåg vunne ei rekkje konkurransar om kyrkjekunst og laga fleire store kyrkjeutsmykkingar, mellom anna Nidarosdomen med bispekåpe og alterskap, skriv Guddal om Gullvåg.
I tillegg har den frittståande serien «Den Bibelske Syklus» turnert ei rekkje katedralar og museum i Europa, Kina og Midtausten. Internasjonalt har han hatt stor utstillingsaktivitet i Kina.
– Gullvåg er mest truleg den mest utstilte norske kunstnar nokosinne med nesten 30 store utstillingar i Kina. Og også i Midtausten med fleire utstillingskonsept i fleire land, sluttar Gøril Guddal i si omtale av Gullvåg.
