Grønt skifte på folkehøgskulen
Over mange år har fokuset på miljø og bærekraft vakse jamt og trutt ved Sunnhordland folkehøgskule.
Meir enn nokon gong er det viktig å setja straumforbruket under lupa, og ved folkehøgskulen prøver dei å knipa inn på alt.
– I nybygga har me ikkje slått på varmepumpene enno, og tanken er òg å kopla frå tre av varmtvasstankane i dei minste internata. Så får me sjå korleis det går, seier rektor Bente Sjo.
Annonse
Eit anna viktig tiltak er byte til sensorar så lyset slår seg på automatisk, og skifte til LED-pærer alle stader. På det nye internatet er det lagt solcellepanel på taket.
– Me har eit solcelleanlegg på 15 kW, fortel vaktmeister Jostein Svalland.
Matsvinn
Matsvinn er noko folkehøgskulen har jobba aktivt med i mange år, fortel Nina Monssen, som er kokk ved skulen.
Annonse
– Me har bevisst sjeldan buffet ved middagen, fordi det då vert meir svinn. Middagen vert servert i skåler på borda, og me oppfordrar elevane om å forsyna seg fleire gonger, snarare enn store porsjonar. Me frys mat som er til overs, og har restedagar. Alt i alt kastar me lite mat. For å kutta kjøtforbruket har me vegetardag kvar torsdag.
Gjenbruk
Nokre miljøtiltak er kjekkare enn andre:
– Me kjører byttedag med klede i løpet av året, og dette er alltid populært. Då har me med symaskin så folk kan få reparert sunde klede. I tillegg har me arrangert Green Friday i staden for Black Friday, der me heller enn å handla, har plukka bos, seier Eli Hårklau, lærar på skodespel-linja.
Apropos bosrydding; nokre av elevane har allereie hatt seg ein runde med strandrydding langs strandlina like ved skulen. Fangsten vart heller laber, fortel elevane som var med. Tre slunkne bosposar var alt dei fann.
Folkehøgskulen har drive strandrydding kvart år sidan historia om kvalen som var full i plast, og funna i år er det minste dei har hatt.
Annonse
Også boset skal til gjenbruk: Kunstelevane går gjennom alt dei har funne, for å sjå om noko kan høva som materiale for den artige kunstgreina «trash-art», før restane hamnar i det sirlege søppelsorteringssystemet til vaktmeister Jostein.
Tilhøyr til naturen
Folkehøgskulen prøver å fremja nærare kontakt med og tilhøyr til naturen gjennom ulike aktivitetar. I valfaget friluftsliv får elevane fiska, og laga mat av det dei får. Dei har rydda langs dei gamle steingardane, og held på å byggja gapahuk. På fritida kan elevane nytta skulen sine kanoar.
– Å vera glad i naturen er essensielt for å villa ta vare på han. Derfor er trivselsaktivitetar i naturen også viktig som bevisstgjering i høve miljø og bærekraft, sluttar Bente Sjo.
