God interesse for Omstock

– Programmet er variert og folkeleg, og eg gler meg stort til festivalen, seier styreleiar i Omstock Trond Betten.

Betten booka festsalen for å tilby ein regnversgaranti, men det var kanskje unødvendig då det ser ut til at vêrgudane er med dei.

– I tillegg til regnversgaranti byr festsalen på god lyd og hyggjeleg stemning, seier Betten.

Han fortel vidare at billettsalet er godt i gang, og at det har vore bra respons både blant publikum og friviljuge.

På Omstock sine sider kan vi diverre sjå at rockeartisten Ronnie Romero har meldt avbod. Han har utsett Norgesturneen grunna uventa hendingar, i følgje pressemeldinga. Det er likevel vel verdt å ta turen, då programmet for festivalen er spennande, variert og noko for ein kvar smak. I staden for Romero kjem det to lokale artistar; Inger Lise Hope frå «The Voice 2024» og trommeslager Johannes Rørvik Grov, som blei verdskjend for sine fantastiske ferdigheiter bak trommene da han spelte til Metallicasanger som 10 åring.

Opning av festivalen

Festivalen vert opna torsdag av Inger Lise Hope, og konserten er open for alle.

– Det er viktig med lokale arrangement, der ein kan samlast og vera sosiale uavhengig av alder. Eg ynskjer å gje tilbake til lokalsamfunnet gjennom å visa frem lokale artistar. Det er viktig å inspirere og motivere kvinnheringsungdommen til song- og musikkinteresse, fortel Betten.

Kvelden vert avslutta av DJ Virtue med slagordet «We love to dance». Det er lovnader om god klubb- og diskotekstemning for danseglade menneske.

Få av bunaden og fortsett feiringa i festsalen!

Fredag 17. mai vert opna av «3 Busserulls Show», som serverer legendariske låtar og ein god porsjon humor etter nesten 20 år sidan siste besøk. Neste artist er Kristoffer Sørensen frå «The Voice 2023». I følgje pressemeldinga blir han skildra som ein særeigen artist med djup røyst og sterk aura. Han skal spele både fredag og laurdag.

– Eg håpar at publikum vil bli betre kjend med Sørensen og hans musikk. Vi er stolte over å presentere han, og håper fleire vil få seg ein ny favorittartist, seier Betten.

Siste band på scenen denne festdagen er Lydhør beståande av Alexandra Sanden frå Husnes, kjend frå «Idol» og «Norske Talenter». Ho blir akkompagnert av Remi Sjo på trommer og Trond Betten på gitar. Det vil bli spelt hits i frå 60-tallet og fram til i dag i ein sprek, moderne, rocka og akustisk form, i følgje Omstock sin facebook-side.

Rocketrommer og ein saftig rockeavslutning

Laurdag byrjar Johannes Rørvik Grov underhaldninga i festsalen. 10-år gamal blei han hylla av sjølvaste Metallica for sitt fantastiske trommespel, og på denne dagen skal han dele sitt unike talent med publikum. Deretter er det, i følgje pressemeldinga, den barske, hårete og skjeggete vikingen Sørensen sin tur igjen på scena. Det scenevante og ambisiøse rockebandet Variety Jones avsluttar kvelden og sjølve festivalen.

– Dei er utåtvendte, med ein karismatisk frontfigur og dette vil bli ei avslutning med ein saftig rockepakke, fortel Betten.

Ein må halda seg fast for bandet skal visst høvla over Festsalen til det dryp av veggane, heiter det i pressemeldinga.

Det høyrest ut til at det vil bli ein fantastisk og ugløymeleg Omstock 2024.